గృహ రుణాలపై వడ్డీ రేట్లను పెంచేసిన హెచ్ డీఎఫ్ సీ!

దేశంలో అతిపెద్ద హౌసింగ్ ఫైనాన్స్ సంస్థ హెచ్ డీఎఫ్ సీ గృహ రుణాలపై వడ్డీ రేట్లను పెంచింది. బెంచ్ మార్క్ ప్రైమ్ లెండింగ్ (పీఎల్ఆర్) రేటును 2013 డిసెంబర్ తర్వాత పెంచడం ఇదే తొలిసారి. రూ.30 లక్షలకు పైన ఉన్న రుణాలపై 0.20 శాతం పెంచగా, ఆ లోపు ఉన్న రుణాలపై కేవలం 0.05 శాతమే పెంచడం గమనార్హం. అల్పాదాయ వర్గాలు ఎక్కువగా రూ.30 లక్షల్లోపే రుణాలు తీసుకుంటాయి. వాటిపై భారం లేకుండా చూసింది.

తాజా పెంపుతో రూ.30 లక్షల్లోపు గృహ రుణాలపై వడ్డీ రేటు 8.40 శాతం నుంచి 8.45 శాతానికి, రూ.30-75 లక్షల మధ్య రుణాలపై వడ్డీ రేటు 8.40 శాతం నుంచి 8.60 శాతానికి, రూ.75 లక్షలకు పైన రుణాలపై 8.50 శాతం నుంచి 8.70 శాతానికి పెరిగింది. ఇటీవలి కాలంలో ప్రభుత్వ పదేళ్ల బాండ్లపై రాబడులు పెరిగిపోతుండంతో బ్యాంకులు రుణాలు, డిపాజిట్లపై రేట్లను పెంచుతున్న విషయం తెలిసిందే. ఎస్ బీఐ, పలు ఇతర బ్యాంకులు సైతం ఇప్పటికే ఈ విధమైన నిర్ణయాలు తీసుకున్నాయి.