రూ. 1500లోపే విమాన టిక్కెట్... అంద‌జేస్తోన్న ఇండిగో

నూత‌న సంవ‌త్స‌రం సంద‌ర్భంగా ప్ర‌ముఖ విమాన‌యాన సంస్థ ఇండిగో ఎయిర్‌లైన్స్‌, విమాన ప్ర‌యాణ ధ‌ర‌ల‌పై ఆఫ‌ర్ ప్ర‌క‌టించింది. ఈ ఆఫ‌ర్‌లో భాగంగా కొన్ని ప్రాంతాల మ‌ధ్య విమాన టిక్కెట్ల‌ను రూ. 1500ల కంటే త‌క్కువ‌కే అంద‌జేస్తున్న‌ట్లు తెలిపింది. ఈ ఆఫ‌ర్‌లో భాగంగా ఢిల్లీ నుంచి ల‌క్నోకి టిక్కెట్‌ ప్రారంభ ధర రూ.1030, బాగ్డోగ్రా నుంచి గౌహ‌తికి ప్రారంభ ధర రూ.1005, కోయంబత్తూర్‌ నుంచి చెన్నైకి రూ.1095గా పేర్కొంది.

అంతేకాకుండా ప్రతి ప్యాసింజర్‌ కన్వీనియన్స్‌ ఫీజుగా రూ.200 అదనంగా చెల్లించాల్సి ఉంది. ఈ టిక్కెట్‌ ధరలు జనవరిలో బుకింగ్స్‌కు మాత్రమే అందుబాటులో ఉండ‌నున్నాయి. వీటితో పాటు చెన్నై నుంచి బెంగళూరుకు రూ.1,120, చెన్నై నుంచి కోయంబత్తూరుకు రూ.1,148, ఢిల్లీ నుంచి జయపురకు రూ.1,176గా నిర్ణయించిన‌ట్లు త‌మ‌ వెబ్‌సైట్లోని బుకింగ్‌ పోర్టల్‌లో ఇండిగో పేర్కొంది.