పాకిస్థాన్ కుదేలు.. దారుణంగా పడిపోయిన రూపాయి మారకం విలువ

పాకిస్థాన్‌లో ఆర్థిక పరిస్థితి రోజురోజుకు మరింత దిగజారుతోంది. పెరిగిపోతున్న ఆర్థిక ఒత్తిడిని తగ్గించుకునేందుకు ఆ దేశ సెంట్రల్ బ్యాంకు చేస్తున్న ప్రయత్నాలు ఫలితాన్ని ఇవ్వడం లేదు. మంగళవారం పాకిస్థాన్ రూపాయి మారకం విలువ మరింతగా దిగజారింది. సాయంత్రం 4:57 గంటలకు కరాచీలో ఆ దేశ రూపాయి మారకం విలువ దారుణంగా క్షీణించింది. 1.9 శాతం క్షీణించి డాలర్‌కు 109.5 రూపాయలకు చేరుకుంది. శుక్రవారం తర్వాత ప్రపంచవ్యాప్తంగా మారకం విలువ ఇంత దారుణంగా క్షీణించడం ఇదే తొలిసారి.

రూపాయి మారకం విలువ పడిపోవడంపై పాక్ ఆర్థిక శాఖ మాజీ కార్యదర్శి వకార్ మసూద్ మాట్లాడుతూ ‘ఇది అసాధారణం’ అని పేర్కొన్నారు. ఆర్థిక సమస్యలపై మరింతగా దృష్టి సారించాల్సిన అవసరం ఉందని అన్నారు. పడిపోతున్న విదేశీ మారక ద్రవ్య నిల్వలను కాపాడుకునేందుకు ప్రభుత్వం గతనెలలో 2.5 బిలియన్ డాలర్లు అప్పు చేసింది. కాగా, అక్టోబరు నాటికి పాక్ వద్ద ఉన్న విదేశీ ద్రవ్య నిల్వలు 29 శాతం క్షీణించి 12.9 బిలియన్ డాలర్లకు చేరుకున్నాయి.