అమెరికా పాస్ పోర్టు విధానంలో కొత్త నిబంధనలు.. లైంగిక దాడులకు పాల్పడితే పాస్ పోర్ట్ రద్దు !

తమ పాస్ పోర్ట్ విధానంలో కొత్త నిబంధనలను విధిస్తున్నట్టు అమెరికా తెలిపింది. పిల్లలపై లైంగిక దాడులకు పాల్పడిన వారి పాస్ పోర్ట్ లను రద్దు చేసే ప్రక్రియను త్వరలోనే ప్రారంభిస్తున్నట్టు వెల్లడించింది. వీరంతా, పాస్ పోర్ట్ ల కోసం మళ్లీ కొత్తగా దరఖాస్తు చేసుకోవాల్సి ఉంటుంది. అంతేకాదు, కొత్త విధానం ప్రకారం 'పిల్లలపై లైంగిక దాడులకు పాల్పడిన ఈ పాస్ పోర్ట్ దారుడు అమెరికా చట్టాల ప్రకారం విచారణ ఎదుర్కొన్నాడు' అంటూ పాస్ పోర్ట్ వెనుకవైపు ఉన్న కవర్ లోపల ముద్రిస్తారు. మొదటిసారి పాస్ పోర్టుకు దరఖాస్తు చేసుకునేవారికి కూడా ఈ నిబంధన వర్తిస్తుంది.

అయితే ప్రభుత్వ నిర్ణయంపై ఉదారవాదులు మండిపడుతున్నారు. కేవలం ఒక వర్గం వారిని లక్ష్యం చేసుకునే ఈ నిబంధనను తీసుకొస్తున్నారని వారు మండిపడుతున్నారు. 1994లో జరిగిన ఓ ఘటనే ఈ నిబంధనను తీసుకురావడానికి కారణం. మేగన్ కంకా అనే ఏడేళ్ల బాలికను ఓ వ్యక్తి రేప్ చేసి చంపేశాడు. అనంతరం బాలబాలికల రక్షణ కోసం అమెరికా 'అంతర్జాతీయ మేగన్ చట్టం'ను తీసుకొచ్చింది. ఈ చట్టం ప్రకారమే పాస్ పోర్ట్ విధానంలో మార్పులు చేస్తున్నామని అమెరికా విదేశాంగ శాఖ తెలిపింది.