తక్కువ సమయంలో ఎక్కువ పాప్యులారిటీ కోసమే 'న్యూడ్' ప్రకటన: ఇంతకాలానికి నిజం ఒప్పుకున్న పూనమ్ పాండే
అది 2011లో వరల్డ్ కప్ క్రికెట్ పోటీలు జరుగుతున్న రోజులు... ఐదేళ్ల క్రితం జరిగిన ఈ పోటీల గురించి ఏ విషయం గుర్తున్నా, లేకున్నా పూనమ్ పాండే అనే మోడల్ పేరు మాత్రం గుర్తుకు వచ్చి తీరుతుంది. ఇండియా గెలిస్తే, తాను న్యూడ్ షో చేస్తానంటూ సంచలన ప్రకటనే చేసి రాత్రికి రాత్రే సెలబ్రిటీగా మారిపోయింది. అప్పట్లో ఆ ప్రకటన ఎందుకు ఇచ్చానన్న విషయం వెనకున్న అసలు నిజాన్ని ఇప్పుడు పంచుకుందా భామ. తన గురించి అప్పట్లో పెద్దగా ఎవరికీ తెలియదని, తనకంటూ గుర్తింపును తెచ్చుకోవాలని భావించి, ఆ ప్రకటన చేశానని చెప్పింది. ఆ ప్రకటన తరువాత తాను ఊహించినంత పాప్యులారిటీ వచ్చిందని, సినిమా అవకాశాలు వెతుక్కుంటూ వచ్చాయని చెప్పుకొచ్చింది. అయితే, అవన్నీ అందాల ఆరబోతకు చెందినవే కావడంతో, వాటిని వద్దనుకున్నానని వెల్లడించింది. పూనమ్ పాండే కేవలం మూడు సినిమాల్లో మాత్రమే కనిపించిన సంగతి తెలిసిందే.
