పూజా హెగ్డే, హరీశ్ శంకర్, అనిల్ రావిపూడి, వి.వి. వినాయక్‌లతో జీ తెలుగు వీకెండ్ సందడి!

బుల్లితెర తారల ప్రతిభను గౌరవిస్తూ, వెండితెర ప్రముఖుల ఆసక్తికరమైన అనుభవాలను ప్రేక్షకులకు చేరువ చేస్తూ జీ తెలుగు ఈ వారాంతంలో వినోదాల విందును అందించేందుకు సిద్ధమైంది. శనివారం, అక్టోబర్ 31న సాయంత్రం 5 గంటలకు ‘జీ తెలుగు కుటుంబం అవార్డ్స్ 2026 పార్ట్-1’ ప్రసారం కానుండగా.. ఆదివారం, నవంబర్ 1న రాత్రి 7:30 గంటలకు ‘జయమ్ము నిశ్చయమ్మురా సీజన్ 2’లో ప్రముఖ నటి పూజా హెగ్డే, దర్శకుడు హరీశ్ శంకర్ హోస్ట్ జగపతిబాబుతో ఆసక్తికరమైన సంభాషణలో పాల్గొననున్నారు. అవార్డుల వేడుకలో సినీ ప్రముఖుల సందడి ఒక ప్రత్యేక ఆకర్షణగా నిలవనుండగా, జయమ్ము నిశ్చయమ్మురాలో సినీ తారల అనుభవాలు, మధుర జ్ఞాపకాలు ప్రేక్షకులను అలరించనున్నాయి.

సుధీర్, రవి వ్యాఖ్యాతలుగా వ్యవహరించనున్న ‘జీ తెలుగు కుటుంబం అవార్డ్స్ 2026 పార్ట్-1’ జీ తెలుగు నటీనటులు, ప్రేక్షకులతో సందడిగా సాగనుంది. ప్రముఖ టీవీ నటీనటులతో పాటు టాలీవుడ్ ప్రముఖులు కూడా ఈ వేడుకలో పాల్గొని కార్యక్రమానికి మరింత ప్రత్యేకతను తీసుకురానున్నారు. అద్భుతమైన ప్రదర్శనలు, ప్రత్యేక కార్యక్రమాలు, ప్రతిభను గుర్తించే అవార్డులతో ఈ వేడుక ప్రేక్షకులకు కనువిందుగా నిలవనుంది.

ఈ వేడుకలో బంగారు కుటుంబం, లవ్ బర్డ్స్ ఆఫ్ జీ తెలుగు, ఉత్తమ భార్యాభర్తలు, డ్రీమ్ కపుల్, బెస్ట్ ఎంటర్‌టైనింగ్ కపుల్, ఉత్తమ సీరియల్, ఆరంభం ఒక అడుగుతోనే వంటి విభాగాల్లో అవార్డులు అందించనున్నారు. అలాగే బెస్ట్ యాంకర్, బెస్ట్ ఎంటర్‌టైనింగ్ జడ్జ్, ఉత్తమ కథానాయకి, జయం మనదేరా, ఉత్తమ ప్రతినాయకి సీనియర్ వంటి విభాగాల్లోనూ ప్రతిభావంతులను గుర్తించనున్నారు. జీ తెలుగు కార్యక్రమాలు, నటీనటులు ప్రేక్షకులతో ఏర్పరచుకున్న ప్రత్యేక అనుబంధాన్ని చాటిచెప్పేలా ఈ అవార్డుల వేడుక సాగనుంది.

ఈ వేడుకలో టాలీవుడ్ ప్రముఖులు అనిల్ రావిపూడి, వి.వి. వినాయక్, కేథరిన్ ట్రెసా, అలీ, గాయకుడు మనో, ‘కాస్ట్’ సినిమా బృందం, ప్రముఖ వెండితెర జంట మౌళి, శివాని అవార్డుల ప్రదానోత్సవంలో పాల్గొననున్నారు. కళాకారులు, అభిమానుల మధ్య ఆత్మీయ సంభాషణలు, వినోదభరితమైన ప్రదర్శనలు, భావోద్వేగభరితమైన క్షణాలతో ఈ కార్యక్రమం జీ తెలుగు కుటుంబంలోని ప్రతిభను, అనుబంధాలను ఘనంగా చాటిచెప్పనుంది.

ఇక ఆదివారం ప్రసారమయ్యే ‘జయమ్ము నిశ్చయమ్మురా సీజన్ 2’లో హోస్ట్‌ ప్రముఖ నటుడు జగపతిబాబు నటి పూజా హెగ్డే, దర్శకుడు హరీశ్ శంకర్‌తో ముచ్చటించనున్నారు. తెలుగు ప్రేక్షకులకు ‘బుట్టబొమ్మ’గా సుపరిచితమైన పూజా హెగ్డే, తన సినీ ప్రయాణంలోని అనుభవాలు, జ్ఞాపకాలను పంచుకోనుండగా.. హరీశ్ శంకర్ కూడా తన సినిమా ప్రయాణానికి సంబంధించిన ఆసక్తికరమైన విషయాలను వెల్లడించనున్నారు.

ఈ సంభాషణలో అల్లు అర్జున్, పూజా హెగ్డే జంటగా నటించి, హరీశ్ శంకర్ దర్శకత్వం వహించిన ‘దువ్వాడ జగన్నాథం (DJ)’ సినిమా జ్ఞాపకాలు కూడా ప్రత్యేక ఆకర్షణగా నిలవనున్నాయి. ఈ సినిమా ద్వారా ఏర్పడిన వారి అనుబంధాన్ని మరోసారి గుర్తుచేసుకుంటూ, సినిమా నిర్మాణం, తెరవెనుక అనుభవాలకు సంబంధించిన విషయాలను ప్రేక్షకులతో పంచుకోనున్నారు. జగపతిబాబు తనదైన శైలిలో సంభాషణను ముందుకు తీసుకెళ్లనుండటంతో ఈ ఎపిసోడ్‌లో సరదా మాటలు, ఆసక్తికరమైన విశేషాలు, వ్యక్తిగత అనుభవాలు ప్రేక్షకులను అలరించనున్నాయి.

ఒకవైపు బుల్లితెర తారల విజయాలను ఘనంగా జరుపుకునే అవార్డుల వేడుక.. మరోవైపు వెండితెర ప్రముఖుల అనుభవాలు, జ్ఞాపకాలను ఆవిష్కరించే ప్రత్యేక కార్యక్రమం.. ఇలా ఈ వారాంతంలో జీ తెలుగు ప్రేక్షకులకు రెండు విభిన్నమైన వినోద అనుభూతులను అందించనుంది.