ఏపీలో '108' సేవలకు కొత్త రూపు

ఆంధ్రప్రదేశ్‌లో 108 అంబులెన్స్ సేవలను ప్రభుత్వం సమూలంగా ఆధునికీకరించి, లక్షలాది మందికి అత్యవసర సమయాల్లో ప్రాణదాతగా నిలుపుతోంది. "ప్రాణం కాపాడటంలో ప్రతి సెకను విలువైంది" అనే నినాదంతో పనిచేస్తూ, గత ఏడాది కాలంలోనే దాదాపు 7.78 లక్షల మందికి అత్యవసర సేవలు అందించినట్లు ఆదివారం ప్రభుత్వం విడుదల చేసిన అధికారిక ప్రకటనలో వెల్లడించింది.

భవ్య హెల్త్ కేర్‌ భాగస్వామ్యంతో సంకీర్ణ ప్రభుత్వం ఈ సేవలను అంతర్జాతీయ ప్రమాణాలకు అనుగుణంగా తీర్చిదిద్దింది. అధునాతన జీపీఎస్ ట్రాకింగ్, రియల్-టైమ్ ట్రాఫిక్ రూటింగ్, డిజిటల్ పేషెంట్ లాగ్స్ వంటి టెక్నాలజీని జోడించి, ప్రమాదం జరిగిన తర్వాత అత్యంత కీలకమైన 'గోల్డెన్ అవర్'లో బాధితులకు సత్వర చికిత్స అందేలా చర్యలు తీసుకుంది.

 2025 జూన్ నుంచి 2026 మే మధ్య కాలంలో 108 బృందాలు మొత్తం 7,78,799 ఎమర్జెన్సీ కాల్స్‌కు స్పందించాయి. ఇందులో 1,13,764 రోడ్డు ప్రమాద బాధితులకు ప్రమాదం జరిగిన చోటే స్థిరమైన చికిత్స అందించారు. అదేవిధంగా, గ్రామీణ ఆరోగ్య సంరక్షణలో కీలక పాత్ర పోషిస్తూ, 1,05,786 మంది గర్భిణులను సురక్షితంగా ఆసుపత్రులకు తరలించారు. ఇది మాతాశిశు మరణాల రేటును తగ్గించడంలో గణనీయంగా దోహదపడింది.

ఇక ఇతర కేసుల వివరాలు చూస్తే, శ్వాసకోశ సమస్యలతో 97,118 మందికి, గుండె సంబంధిత సమస్యలతో 45,951 మందికి, పక్షవాతంతో బాధపడుతున్న 20,278 మందికి తక్షణ వైద్య సహాయం అందించారు. అంబులెన్సులలో అడ్వాన్స్‌డ్ లైఫ్ సపోర్ట్ (ఏఎల్ఎస్) సిస్టమ్స్, శిక్షణ పొందిన సిబ్బంది అందుబాటులో ఉండటం వల్ల ఎంతోమంది ప్రాణాలు నిలబడుతున్నాయని ప్రభుత్వం తన ప్రకటనలో వివరించింది.