ఫిన్ అలెన్ ఊచకోత... ఢిల్లీ క్యాపిటల్స్ పై కేకేఆర్ అలవోక విజయం

ఐపీఎల్ 2026లో కోల్‌కతా నైట్ రైడర్స్ (కేకేఆర్) జైత్రయాత్ర కొనసాగుతోంది. ఢిల్లీలోని అరుణ్ జైట్లీ స్టేడియంలో శుక్రవారం జరిగిన మ్యాచ్‌లో, ఓపెనర్ ఫిన్ అలెన్ (100 నాటౌట్) అజేయ సెంచరీ సాధించడంతో, ఢిల్లీ క్యాపిటల్స్‌ను 8 వికెట్ల తేడాతో కేకేఆర్ చిత్తు చేసింది. ఈ సీజన్‌లో కోల్‌కతాకు ఇది వరుసగా నాలుగో గెలుపు కావడం విశేషం.

143 పరుగుల లక్ష్యంతో బరిలోకి దిగిన కేకేఆర్.. అలెన్ విధ్వంసంతో మరో 34 బంతులు మిగిలి ఉండగానే, కేవలం 14.2 ఓవర్లలోనే విజయాన్ని అందుకుంది. కేవలం 47 బంతుల్లోనే సెంచరీ పూర్తి చేసిన అలెన్ తన ఇన్నింగ్స్‌లో 5 ఫోర్లు, 10 భారీ సిక్సర్లు బాదాడు. అతనికి కామెరాన్ గ్రీన్ (33 నాటౌట్) చక్కటి సహకారం అందించాడు. వీరిద్దరూ కలిసి అజేయంగా 116 పరుగుల భాగస్వామ్యం నెలకొల్పారు.

ఛేదన ఆరంభంలో కేకేఆర్ కెప్టెన్ అజింక్యా రహానే, అంగ్‌క్రిష్ రఘువంశీ వికెట్లను త్వరగానే కోల్పోయింది. అయితే, క్రీజులోకి వచ్చిన గ్రీన్‌తో కలిసి అలెన్ ఇన్నింగ్స్‌ను ముందుకు నడిపించాడు. ఢిల్లీ బౌలర్లపై పూర్తి ఆధిపత్యం ప్రదర్శిస్తూ, ముఖ్యంగా స్పిన్నర్లను లక్ష్యంగా చేసుకుని భారీ షాట్లతో విరుచుకుపడ్డాడు. విప్రాజ్ నిగమ్ వేసిన ఒకే ఓవర్‌లో మూడు సిక్సర్లు బాది మ్యాచ్ స్వరూపాన్నే మార్చేశాడు. చివరగా, ముఖేష్ కుమార్ బౌలింగ్‌లో మిడ్ వికెట్ మీదుగా సిక్సర్ బాది తన సెంచరీని, జట్టు విజయాన్ని ఘనంగా పూర్తి చేశాడు.

అంతకుముందు, కేకేఆర్ బౌలర్ల కట్టుదిట్టమైన బౌలింగ్‌కు ఢిల్లీ క్యాపిటల్స్ నిర్ణీత 20 ఓవర్లలో 8 వికెట్ల నష్టానికి 142 పరుగులు మాత్రమే చేయగలిగింది.

సంక్షిప్త స్కోర్లు:

ఢిల్లీ క్యాపిటల్స్: 142/8 (20 ఓవర్లు) (పాతుమ్ నిస్సంక 50, అశుతోష్ శర్మ 39; కార్తీక్ త్యాగి 2-25, అనుకుల్ రాయ్ 2-31)

కోల్‌కతా నైట్ రైడర్స్: 147/2 (14.2 ఓవర్లు) (ఫిన్ అలెన్ 100 నాటౌట్, కామెరాన్ గ్రీన్ 33 నాటౌట్; అక్షర్ పటేల్ 1-27)