పశ్చిమాసియా టెన్షన్: లాభాలు ఆవిరి.. ఫ్లాట్‌గా ముగిసిన మార్కెట్లు

దేశీయ స్టాక్ మార్కెట్లు నేడు స్వల్ప లాభాలతో ఫ్లాట్‌గా ముగిశాయి. రోజంతా సానుకూలంగా ట్రేడ్ అయినప్పటికీ, చివరి గంటలో అమ్మకాల ఒత్తిడితో సూచీలు లాభాలను చాలావరకు కోల్పోయాయి. పశ్చిమాసియాలో పెరుగుతున్న భౌగోళిక రాజకీయ ఉద్రిక్తతలు ఇన్వెస్టర్ల సెంటిమెంట్‌ను దెబ్బతీశాయి. ట్రేడింగ్ ముగిసే సమయానికి, సెన్సెక్స్ 27 పాయింట్ల స్వల్ప లాభంతో 78,520.30 వద్ద, నిఫ్టీ 11.30 పాయింట్లు పెరిగి 24,364.85 వద్ద స్థిరపడ్డాయి.

పశ్చిమాసియాలో అమెరికా, ఇరాన్ మధ్య మళ్లీ ఉద్రిక్తతలు రాజుకోవడమే మార్కెట్ల బలహీన ట్రెండ్ కు ప్రధాన కారణం. గల్ఫ్ ఆఫ్ ఒమన్‌లో ఇరాన్‌కు చెందిన కార్గో నౌకను అమెరికా నౌకాదళం స్వాధీనం చేసుకోవడం, హర్మూజ్ జలసంధిలో వాణిజ్య నౌకలపై ఇరాన్ కాల్పులు జరిపినట్లు వచ్చిన వార్తలు అంతర్జాతీయంగా ఆందోళన పెంచాయి. ఈ పరిణామాలతో అంతర్జాతీయ చమురు సరఫరాకు అంతరాయం కలగవచ్చనే భయాలు మార్కెట్లలో అనిశ్చితికి దారితీశాయి. దీంతో మార్కెట్లలో అస్థిరతకు సూచిక అయిన ఇండియా వీఐఎక్స్ ఏకంగా 10.5 శాతం పెరిగి 19.01 స్థాయికి చేరింది.

రంగాల వారీగా చూస్తే, పీఎస్‌యూ బ్యాంకింగ్, మీడియా రంగాల షేర్లు రాణించగా, ఐటీ, రియల్టీ రంగాల్లో అమ్మకాల ఒత్తిడి కనిపించింది. జియో ఫైనాన్షియల్ సర్వీసెస్, హిందాల్కో, టాటా మోటార్స్ వంటి షేర్లు నష్టాలతో సూచీలపై ఒత్తిడి పెంచాయి.

మార్కెట్ నిపుణుల ప్రకారం, నిఫ్టీకి 24,400 - 24,500 జోన్ కీలక నిరోధంగా ఉంది. ఈ స్థాయిని దాటితేనే 25,000 వైపు ర్యాలీ కొనసాగే అవకాశం ఉందని అంచనా వేస్తున్నారు. మరోవైపు, 24,200 తక్షణ మద్దతుగా పనిచేస్తుందని, ఆ తర్వాత 24,000 స్థాయి వద్ద బలమైన డిమాండ్ ఉందని విశ్లేషకులు చెబుతున్నారు. దేశీయంగా పరిస్థితులు అనుకూలంగా ఉన్నప్పటికీ, అంతర్జాతీయ పరిణామాలు స్వల్పకాలికంగా మార్కెట్ గమనాన్ని నిర్దేశిస్తాయని వారు అభిప్రాయపడుతున్నారు.