Abhishek Sharma: నా బ్యాటింగ్ రహస్యం అదే: అభిషేక్ శర్మ

నాగ్‌పూర్‌లోని వీసీఏ స్టేడియంలో న్యూజిలాండ్‌తో నిన్న‌ జరిగిన తొలి టీ20లో భారత యువ ఓపెనర్ అభిషేక్ శర్మ అదరగొట్టాడు. కేవలం 41 బంతుల్లో 84 పరుగులు చేసి జట్టు విజయంలో కీలక పాత్ర పోషించి 'ప్లేయర్ ఆఫ్ ద మ్యాచ్' అవార్డు అందుకున్నాడు. మ్యాచ్ అనంతరం తన దూకుడైన బ్యాటింగ్ శైలిపై ఆసక్తికర వ్యాఖ్యలు చేశాడు.

"దూకుడుగా ఆడాలనేది మా జట్టు ప్రణాళికలో భాగం. తొలి రోజు నుంచి మేము అనుసరిస్తున్న వ్యూహం ఇదే. దానినే నేను కొనసాగిస్తున్నాను" అని అభిషేక్ స్పష్టం చేశాడు. భారీ సిక్సర్లు కొట్టడంపై మాట్లాడుతూ, "200 స్ట్రైక్ రేట్‌తో ఆడాలంటే తీవ్రంగా సాధన చేయాలి. అంతేకాకుండా అదే ఉద్దేశంతో బరిలోకి దిగాలి. ప్రత్యర్థి జట్లు నా కోసం ప్రత్యేక ప్రణాళికలు రచిస్తాయి. వాటిని ఎదుర్కోవడానికి నేను ముందుగానే సిద్ధమవుతాను" అని తెలిపాడు.

టైమింగే నా బలం.. పవర్ కాదు
తన ఆటలో రిస్క్ ఎక్కువగా ఉంటుందా అని అడిగిన ప్రశ్నకు.. "నాకు అలా అనిపించదు. పవర్ ప్లే ఓవర్లను సద్వినియోగం చేసుకోవడమే నా లక్ష్యం. నేను పవర్ హిట్టర్‌ను కాదు, టైమింగ్‌పైనే ఎక్కువగా ఆధారపడతాను. బంతిని చూసి, పరిస్థితులకు తగ్గట్టుగా ఆడటానికి ప్రయత్నిస్తాను" అని వివరించాడు. స్లిప్‌లో ఫీల్డింగ్ చేయడం కూడా తనకు ఎంతో ఇష్టమని, ఫీల్డింగ్ కోచ్ దిలీప్ సర్ ఆధ్వర్యంలో కఠోర సాధన చేస్తున్నానని చెప్పాడు.