Gold Price: పసిడి ధర కిందికి... ఒక్కరోజే రూ.1000కి పైగా పతనం

బంగారం, వెండి ధరలు ఈరోజు భారీగా పతనమయ్యాయి. అమెరికాలో సెప్టెంబర్ నెలకు సంబంధించిన ఉద్యోగాల గణాంకాలు అంచనాలను మించి బలంగా నమోదు కావడంతో ఫెడరల్ రిజర్వ్ సమీప భవిష్యత్తులో వడ్డీ రేట్లను తగ్గించకపోవచ్చనే అంచనాలు పెరిగాయి. ఈ పరిణామం పసిడి ధరలపై ప్రతికూల ప్రభావాన్ని చూపింది.

మల్టీ కమోడిటీ ఎక్స్ఛేంజ్ (MCX)లో డిసెంబర్ గోల్డ్ ఫ్యూచర్స్ ధర 10 గ్రాములకు రూ. 1,067 (0.87 శాతం) తగ్గి రూ. 1,21,697 వద్దకు చేరింది. అలాగే వెండి డిసెంబర్ కాంట్రాక్టులు కిలోకు రూ. 3,349 (2.17 శాతం) పతనమై రూ. 1,50,802 వద్ద ట్రేడ్ అయ్యాయి. ఇండియా బులియన్ అండ్ జువెలర్స్ అసోసియేషన్ (IBJA) ప్రకారం 24 క్యారెట్ల బంగారం ధర 10 గ్రాములకు గురువారం నాటి రూ. 1,22,881 నుంచి రూ. 1,22,149కి దిగివచ్చింది.

అమెరికాలో సెప్టెంబర్‌లో 50,000 కొత్త ఉద్యోగాలు వస్తాయని అంచనా వేయగా, దానికి రెట్టింపునకు పైగా 1,19,000 ఉద్యోగాలు పెరిగాయని మోతీలాల్ ఓస్వాల్ ఫైనాన్షియల్ సర్వీసెస్ విశ్లేషకుడు మానవ్ మోదీ తెలిపారు. ఇది అమెరికా కార్మిక మార్కెట్ పటిష్ఠంగా ఉందని సూచిస్తోందని, దీంతో ఫెడ్ వడ్డీ రేట్లను తగ్గించే అవకాశాలు సన్నగిల్లాయని వివరించారు. దీనికి తోడు డాలర్ ఇండెక్స్ 100 మార్కు పైన బలంగా ఉండటం కూడా బంగారం ధరల పతనానికి కారణమైంది. కాగా, ప్రస్తుత పరిస్థితుల్లో డిసెంబర్‌లో ఫెడ్ వడ్డీ రేట్ల కోతకు 30 నుంచి 40 శాతం మాత్రమే అవకాశం ఉందని మార్కెట్ వర్గాలు భావిస్తున్నాయి.