కౌంటింగ్ వేళ తేజస్వీ ధీమా.. ప్రభుత్వ ఏర్పాటుపై కీలక వ్యాఖ్యలు

బీహార్ శాసనసభ ఎన్నికల ఓట్ల లెక్కింపు ఉత్కంఠగా కొనసాగుతున్న వేళ మహాఘట్‌బంధన్ ముఖ్యమంత్రి అభ్యర్థి, ఆర్జేడీ నేత తేజస్వీ యాదవ్ విజయంపై పూర్తి విశ్వాసం వ్యక్తం చేశారు. ఈ ఎన్నికల్లో తమ కూటమే గెలిచి ప్రభుత్వాన్ని ఏర్పాటు చేస్తుందని ఆయన ధీమాగా ప్రకటించారు. ఈ ఉదయం 8 గంటలకు పోస్టల్ బ్యాలెట్ల లెక్కింపుతో కౌంటింగ్ ప్రక్రియ ప్రారంభమైంది. ఈ నేపథ్యంలో తేజస్వీ యాదవ్ మీడియాతో మాట్లాడుతూ కీలక వ్యాఖ్యలు చేశారు. "మేమే గెలవనున్నాం. అందరికీ ధన్యవాదాలు. రాష్ట్రంలో మార్పు రాబోతోంది. కచ్చితంగా మేమే ప్రభుత్వాన్ని ఏర్పాటు చేస్తాం" అని ఆయన స్పష్టం చేశారు.

మహాఘట్‌బంధన్ కూటమి తరఫున ముఖ్యమంత్రి అభ్యర్థిగా బరిలోకి దిగిన తేజస్వీ యాదవ్ రాఘోపూర్ నియోజకవర్గం నుంచి పోటీ చేస్తున్నారు. ప్రస్తుతం వెలువడుతున్న ఫలితాల సరళి ప్రకారం, ఆయన తన సమీప ప్రత్యర్థి, బీజేపీ అభ్యర్థి సతీష్ కుమార్‌పై ఆధిక్యంలో కొనసాగుతున్నారు.

బీహార్‌లో రెండు దశల్లో జరిగిన ఎన్నికల్లో మొత్తం 67.13 శాతం పోలింగ్ నమోదైంది. అయితే, పోలింగ్ ముగిసిన అనంతరం వెలువడిన దాదాపు అన్ని ఎగ్జిట్ పోల్స్.. అధికార ఎన్డీయే కూటమికే మళ్లీ పట్టం కట్టాయి. కానీ, ఈ అంచనాలను ప్రతిపక్షాలు మొదటి నుంచి తోసిపుచ్చుతున్నాయి. ఎగ్జిట్ పోల్స్‌కు భిన్నంగా ఫలితాలు ఉంటాయని, ప్రజలు మార్పు కోరుకున్నారని విపక్ష నేతలు వాదిస్తున్నారు. కౌంటింగ్ ప్రక్రియ కొనసాగుతుండటంతో పూర్తి ఫలితాలపై సర్వత్ర ఆసక్తి నెలకొంది.