Santhana Prapthirasthu: 'సంతాన ప్రాప్తిరస్తు'... హిట్ ఖాయం అంటున్న మేకర్స్

ఈ మధ్యకాలంలో టాలీవుడ్‌లో చిన్న సినిమాల హవా నడుస్తోంది. 'కోర్ట్', 'లిటిల్ హార్ట్స్' వంటి చిత్రాలు బాక్సాఫీస్ వద్ద మంచి విజయాలు సాధించాయి. గత వారం విడుదలైన 'ది గ్రేట్ ప్రీ-వెడ్డింగ్ షో' కూడా సానుకూల స్పందన తెచ్చుకుంది. ఇదే కోవలో, ఈ వారం ప్రేక్షకుల ముందుకు రాబోతున్న 'సంతాన ప్రాప్తిరస్తు' కూడా ఆ జాబితాలో చేరేలా కనిపిస్తోంది.  ఇప్పటికే రిలీజైన ట్రైలర్ ఆడియన్స్ లో మంచి హైప్ తెచ్చుకుంది. మేల్ ఫెర్టిలిటీ పాయింట్ తో రూపుదిద్దుకున్న ఈ చిత్రం తప్పకుండా ప్రజాదరణ పొందుతుందని చిత్రబృందం ధీమా వ్యక్తం చేస్తోంది.

విక్రాంత్, చాందినీ చౌదరి హీరోహీరోయిన్లుగా నటించిన ఈ చిత్రంలో ఓ ఆసక్తికరమైన కథాంశాన్ని ఎంచుకున్నారు. పిల్లలు కలగడం కోసం ప్రయత్నిస్తున్న ఓ జంట, భర్తకు స్పెర్మ్ కౌంట్ తక్కువగా ఉండటంతో ఎదుర్కొనే సమస్యల చుట్టూ ఈ కథ తిరుగుతుంది. ఇప్పటికే విడుదలైన టీజర్, ట్రైలర్ వినోదాత్మకంగా ఉంటూ ప్రేక్షకులను ఆకట్టుకున్నాయి. విభిన్నమైన పాయింట్‌తో రాబోతున్న ఈ కామెడీ ఎంటర్‌టైనర్‌పై మంచి అంచనాలే ఉన్నాయి.

సంజీవ్ రెడ్డి దర్శకత్వం వహించిన ఈ చిత్రాన్ని మధుర శ్రీధర్ రెడ్డి నిర్మించారు. వెన్నెల కిశోర్, తరుణ్ భాస్కర్, మురళీధర్ గౌడ్ ఇతర కీలక పాత్రలు పోషించారు. ఈ సినిమా ఈ శుక్రవారం (నవంబర్ 14) థియేటర్లలో విడుదల కానుంది.