ఏటా రూ.2 కోట్లు ఆర్జన.. అయినా స్వీపర్ గా విధులు

కోట్లకు పడగలెత్తాక చిన్న పనులు చేయాలంటే చాలామంది నామోషీగా భావిస్తుంటారు. కానీ జపాన్ కు చెందిన ఓ కోటీశ్వరుడు మాత్రం స్వీపర్ గా పనిచేస్తూనే ఉన్నాడు. పెట్టుబడులు, అద్దెల ద్వారా అతడికి ఏటా రూ.2 కోట్ల వరకు ఆదాయం వస్తుంది. ఆ సొమ్ముతో దర్జాగా జీవించే అవకాశం ఉన్నా, తిని ఇంట్లో కూర్చున్నా అడిగే వారు లేకున్నా ఆయన మాత్రం తన పని మానలేదు. ఆ కోటీశ్వరుడి పేరు కోయిచి మత్సుబారా. టోక్యోకు చెందిన మత్సుబారా ఇప్పటికీ అతి తక్కువ వేతనానికే స్వీపర్ గా పనిచేస్తున్నారు.

మత్సుబారా వయస్సు ప్రస్తుతం 56 ఏళ్లు. ఈ వయసులోనూ మత్సుబారా ఓ నివాస సముదాయంలో పార్ట్‌టైమ్ స్వీపర్‌గా పని చేస్తున్నారు. వారంలో మూడు రోజులు, రోజుకు నాలుగు గంటల చొప్పున కష్టపడుతున్నారు. ఇందుకుగానూ మత్సుబారాకు నెలకు సుమారు 1,00,000 యెన్లు.. మన రూపాయల్లో 60 వేల వరకు ముడుతోంది. టోక్యోలో సగటు నెలసరి జీతం 3 లక్షల యెన్లతో పోల్చుకుంటే మత్సుబారా అందుకుంటున్నది తక్కువ మొత్తమేనని చెప్పొచ్చు. అయినా సరే మత్సుబారా తన పని మాత్రం మానకపోవడం విశేషం.