చైనాలో టూరిస్ట్ స్పాట్ గా మారిన పబ్లిక్ టాయిలెట్... కారణం ఇదే!

సాధారణంగా పర్యాటకులు చారిత్రక కట్టడాలు, ప్రకృతి అందాలున్న ప్రదేశాలను చూసేందుకు వెళ్తారు. కానీ, చైనాలో మాత్రం జనం ఓ పబ్లిక్ టాయిలెట్‌ను చూసేందుకు క్యూ కడుతున్నారు. అంతేకాదు, అక్కడ ఫోటోలు దిగేందుకు ప్రత్యేకంగా సాంప్రదాయ దుస్తులు ధరించి మరీ వస్తున్నారు. వినడానికి వింతగా ఉన్నా, గన్సు ప్రావిన్స్‌లోని దున్‌హువాంగ్ నైట్ మార్కెట్‌లో ఉన్న ఈ మరుగుదొడ్డి ఇప్పుడు ఓ ప్రముఖ పర్యాటక కేంద్రంగా మారిపోయింది.

ప్రఖ్యాత మొగావో గుహలకు నెలవైన చారిత్రక సిల్క్ రోడ్ నగరంలో ఈ టాయిలెట్‌ను నిర్మించారు. దీనికి "దున్‌హువాంగ్ ప్యూర్ రియల్మ్ పబ్లిక్ కల్చరల్ స్పేస్" అని పేరు పెట్టారు. ఆగస్టు 16న ప్రారంభమైన ఈ రెండంతస్తుల టాయిలెట్, సౌత్ చైనా మార్నింగ్ పోస్ట్ కథనం ప్రకారం, కేవలం మరుగుదొడ్డిలా కాకుండా ఓ సాంస్కృతిక కేంద్రంలా కనిపిస్తుంది. లోపల గోడలపై దున్‌హువాంగ్ సంస్కృతిని ప్రతిబింబించే చిత్రాలు, పై అంతస్తులో "ఫాంటసీ ప్రపంచం" అనే థీమ్‌తో ప్రత్యేకంగా అలంకరించారు.

ఈ టాయిలెట్‌లో ఆధునిక సౌకర్యాలకు కొదవే లేదు. తల్లీబిడ్డల కోసం యాంటీ-బ్యాక్టీరియల్ టేబుల్స్, చైల్డ్ సేఫ్టీ సీట్లతో కూడిన ప్రత్యేక గది ఉంది. వృద్ధులు, వికలాంగుల కోసం ప్రత్యేక ఏర్పాట్లు, కూర్చోవడానికి సీట్లు, డ్రింక్ డిస్పెన్సర్లు కూడా ఏర్పాటు చేశారు. అన్నిటికంటే ఆసక్తికరమైన విషయం ఏమిటంటే, ఇక్కడి స్టాల్స్ బయట ఓ టైమర్ ఉంటుంది. ఎవరైనా లోపల ఐదు నిమిషాల కంటే ఎక్కువ సేపు ఉంటే, ఆ డిస్‌ప్లే రంగు మారి హెచ్చరిస్తుంది.

ఈ వింత టాయిలెట్ సోషల్ మీడియాలో విపరీతంగా వైరల్ అయ్యింది. "నేను నైట్ మార్కెట్‌లో టాయిలెట్ కోసం వెతుకుతూ, పొరపాటున ఏదో కొత్త గుహలోకి వచ్చానేమో అనుకున్నాను" అని ఓ మహిళ తన అనుభవాన్ని పంచుకున్నారు. "ఇంత విలాసవంతమైన పబ్లిక్ టాయిలెట్‌ను నా జీవితంలో ఎప్పుడూ చూడలేదు" అని మరో నెటిజన్ వ్యాఖ్యానించారు. దీంతో ఈ ప్రదేశాన్ని సందర్శించే వారి సంఖ్య రోజురోజుకూ పెరుగుతోంది.