Kumari Aunty: సోషల్ మీడియాలో కుమారీ ఆంటీ భావోద్వేగ వీడియో.. ఇంతకీ ఏమైందంటే?

సోషల్ మీడియాలో తన ఫుడ్ వీడియోలతో లక్షలాది మంది అభిమానులను సంపాదించుకున్న కుమారీ ఆంటీ మరోసారి వార్తల్లో నిలిచారు. ఇటీవల ముగిసిన వినాయక చవితి ఉత్సవాల్లో భాగంగా జరిగిన ఓ లడ్డూ వేలంలో ఆమె పాల్గొని, గణేశుడి ప్రసాదాన్ని దక్కించుకున్నారు. ఇది తన పదిహేనేళ్ల కల అని చెబుతూ ఆమె పంచుకున్న ఓ వీడియో ప్రస్తుతం నెట్టింట వైరల్‌గా మారింది.

వినాయక నిమజ్జనం సందర్భంగా స్థానికంగా నిర్వహించిన లడ్డూ వేలం పాటలో కుమారీ ఆంటీ పాల్గొన్నారు. ఉత్కంఠభరితంగా సాగిన ఈ వేలంలో ఆమె పోటీపడి లడ్డూను సొంతం చేసుకున్నారు. ఈ సంతోషకరమైన విషయాన్ని తన ఇన్‌స్టాగ్రామ్ ఖాతా ద్వారా అభిమానులతో పంచుకున్నారు. ఈ లడ్డూ తనకు చాలా ప్రత్యేకమని, ఎన్నో ఏళ్లుగా ఎదురుచూస్తున్న కోరిక ఇప్పుడు తీరిందని ఆమె ఆనందం వ్యక్తం చేశారు.

ఈ సందర్భంగా ఆమె తన వీడియోలో భావోద్వేగంగా మాట్లాడారు. “నేను హోటల్ ప్రారంభించి 15 సంవత్సరాలు అవుతోంది. అప్పటి నుంచి ప్రతి ఏటా వినాయకుడికి ప్రసాదం సమర్పిస్తున్నాను. గణపయ్యా.. నీ లడ్డూ నాకు ఎప్పుడిస్తావు అని అడుగుతూనే ఉన్నాను. చివరికి ఈ ఏడాది స్వామివారు కరుణించి ఆశీర్వాదంగా ఈ లడ్డూను నాకిచ్చారు. జై గణేశా, జై జై గణేశా” అని పేర్కొన్నారు.

ఆమె పోస్ట్ చేసిన ఈ వీడియో ప్రస్తుతం సామాజిక మాధ్యమాల్లో వైర‌ల్ అవుతోంది. ఎంతో మంది నెటిజన్లు ఆమెకు శుభాకాంక్షలు తెలుపుతూ కామెంట్లు పెడుతున్నారు. అయితే, ఈ లడ్డూను ఎంత మొత్తానికి వేలంలో దక్కించుకున్నారనే విషయాన్ని మాత్రం కుమారీ ఆంటీ వెల్లడించలేదు. హైదరాబాద్‌లో హోటల్ నిర్వహిస్తున్న ఆమె, తన స్పెషల్ వంటకాలతో పాటు సరదాగా మాట్లాడే తీరుతో సోషల్ మీడియాలో సెలబ్రిటీగా మారిన విషయం తెలిసిందే.