Stock Markets: తీవ్ర ఒడుదొడుకుల మధ్య నష్టాల్లో ముగిసిన స్టాక్ మార్కెట్లు

దేశీయ స్టాక్ మార్కెట్లు మంగళవారం తీవ్ర ఒడుదొడుకుల మధ్య నష్టాలతో ముగిశాయి. ఉదయం ట్రేడింగ్‌లో సానుకూలంగా ప్రారంభమైనప్పటికీ, జీఎస్టీ మండలి సమావేశం, ఫ్యూచర్స్ అండ్ ఆప్షన్స్ (ఎఫ్&ఓ) గడువు ముగింపు నేపథ్యంలో ఇన్వెస్టర్లు అప్రమత్తంగా వ్యవహరించారు. దీంతో భారీగా లాభాల స్వీకరణకు దిగడంతో సూచీలు ఆరంభ లాభాలను కోల్పోయి చివరికి నష్టాల్లో స్థిరపడ్డాయి.

ట్రేడింగ్ ముగిసే సమయానికి, బీఎస్ఈ సెన్సెక్స్ 206.61 పాయింట్లు క్షీణించి 80,157.88 వద్ద స్థిరపడింది. ఉదయం 80,520.09 పాయింట్ల వద్ద సానుకూలంగా మొదలైన సెన్సెక్స్, ఒక దశలో 80,761.14 పాయింట్ల ఇంట్రాడే గరిష్ఠాన్ని తాకింది. అయితే, అమ్మకాల ఒత్తిడి పెరగడంతో నష్టాల్లోకి జారుకుంది. మరోవైపు, ఎన్ఎస్ఈ నిఫ్టీ 45.45 పాయింట్లు నష్టపోయి 24,569.60 వద్ద ముగిసింది.

"మంచి స్థూల ఆర్థిక గణాంకాలతో వచ్చిన ఆరంభ లాభాలను దేశీయ మార్కెట్లు నిలుపుకోలేకపోయాయి. జీఎస్టీ మండలి సమావేశం, ఎఫ్&ఓ ఎక్స్‌పైరీ కారణంగా ఇన్వెస్టర్లు లాభాల స్వీకరణకు మొగ్గు చూపారు. ముఖ్యంగా బ్యాంకింగ్ స్టాక్స్ పతనానికి దారితీశాయి" అని జియోజిత్ ఇన్వెస్ట్‌మెంట్స్ రీసెర్చ్ హెడ్ వినోద్ నాయర్ విశ్లేషించారు. 

రంగాలవారీగా చూస్తే, నిఫ్టీ బ్యాంక్ సూచీ 341 పాయింట్లు, నిఫ్టీ ఆటో 75 పాయింట్లు, నిఫ్టీ ఫైనాన్షియల్ సర్వీసెస్ 170 పాయింట్ల మేర నష్టపోయాయి. అయితే, నిఫ్టీ ఎఫ్‌ఎంసీజీ సూచీ మాత్రం 631 పాయింట్లు లాభపడి మార్కెట్లకు కొంత ఊరటనిచ్చింది. బ్రాడర్ మార్కెట్లలో నిఫ్టీ మిడ్‌క్యాప్, స్మాల్‌క్యాప్ సూచీలు స్వల్ప లాభాలతో ముగిశాయి.

ఇక కరెన్సీ మార్కెట్‌లో, డాలర్‌తో రూపాయి మారకం విలువ స్వల్పంగా 0.05 పైసలు బలపడి 88.16 వద్ద ట్రేడ్ అయింది. రానున్న రోజుల్లో రూపాయి 87.85 నుంచి 88.40 మధ్య కదలాడవచ్చని, విదేశీ సంస్థాగత ఇన్వెస్టర్లు (ఎఫ్ఐఐలు) అమ్మకాల వైపే మొగ్గు చూపుతుండటంతో మార్కెట్లలో అస్థిరత కొనసాగే అవకాశం ఉందని ఎల్‌కేపీ సెక్యూరిటీస్‌కు చెందిన జతిన్ త్రివేది అంచనా వేశారు.