Pawan Kalyan: 'వీరమల్లు' నుంచి వీర రికార్డులు తప్పించుకోలేనట్టే!

పవన్ కల్యాణ్ .. ఈ పేరు చెబితేనే ఆయన అభిమానులలో పూనకాలు వచ్చేస్తాయి. అభిమానులకు ఆయన పేరు ఒక మంత్రమైపోయింది. పవన్ కల్యాణ్ రాజకీయాలలో బిజీగా ఉన్నప్పటికీ, అడపాదడపా మాత్రమే సినిమాలపై ఫోకస్ పెడుతున్నప్పటికీ ఆయన క్రేజ్ ఎంతమాత్రం తగ్గలేదు. 'హరి హర వీరమల్లు' సినిమాకి అడ్వాన్స్ బుకింగ్స్ అందుకు అద్దం పడుతున్నాయి. ఈ సినిమా టిక్కెట్లు ఇప్పుడు హాట్ కేకుల మాదిరిగా అమ్ముడవుతున్నాయి. 

నిజానికి పవన్ కల్యాణ్ ఈ మధ్య కాలంలో భారీ బడ్జెట్ సినిమాలు చేయలేదు. తన రాజకీయ కార్యకలాపాలకు అడ్డురాకుండా ఉండేలా ఆయన చిన్న సినిమాల రీమేకులు చేస్తూ వెళ్లారు. అలా వచ్చినవే 'వకీల్ సాబ్' .. 'భీమ్లా నాయక్' .. 'బ్రో' సినిమాలు. ఈ మూడు కూడా రీమేక్ గా ప్రేక్షకులను పలకరించినవే. పవన్ రేంజ్ కి ఇవి చాలా తక్కువ బడ్జెట్ సినిమాలు. అయినా 100 కోట్ల మార్కును అవలీలగా దాటేయడం ఆయన క్రేజ్ కి కొలమానం.     

ఈ నేపథ్యలోనే పవన్ 'హరిహర వీరమల్లు' వంటి భారీ బడ్జెట్ సినిమాను ఒప్పుకున్నాడు. అయితే ఆయనకి గల బిజీ షెడ్యూల్ కారణంగా ఈ సినిమాను పూర్తి చేయడానికి చాలా సమయం పట్టింది. పవన్ ఫ్యాన్స్ వెయిటింగ్ కి తెరదించుతూ రేపు థియేటర్లకు ఈ సినిమా వస్తోంది. ఈ సినిమా అడ్వాన్స్ బుకింగ్స్ జోరు చూసినవారు, వీరమల్లు వీరవిహారం తప్పదని చెబుతున్నారు. పవన్ కెరియర్ లో రికార్డుస్థాయి ఓపెనింగ్స్ ఖాయమనే అభిప్రాయాలు వినిపిస్తున్నాయి. అదే నిజమవుతుందేమో చూడాలి మరి.