వైసీపీ నేత కాకాణికి ముగిసిన కస్టడీ
- సర్వేపల్లి గ్రావెల్ అక్రమ తవ్వకాల కేసులో కాకాణి కస్టడీ
- రెండ్రోజుల కస్టడీ నేటితో పూర్తి
- సిట్ అధికారులు విచారణ
- కృష్ణపట్నం పోలీస్ స్టేషన్లో కొనసాగిన విచారణ ప్రక్రియ
సిట్ విచారణ ప్రక్రియ పూర్తయిన అనంతరం, అధికారులు కాకాణి గోవర్ధన్రెడ్డిని నెల్లూరు జిల్లా రెండో అదనపు కోర్టు ముందు హాజరుపరిచారు. కోర్టు ఆదేశాల మేరకు ఆయనను తిరిగి నెల్లూరు కారాగారానికి తరలించారు. కాగా, కస్టడీ మొదటి రోజున కూడా సిట్ అధికారులు దాదాపు 30 ప్రశ్నలు సంధించినప్పటికీ, వాటిలో ఏ ఒక్క ప్రశ్నకు కూడా కాకాణి సమాధానం చెప్పలేదని సమాచారం.
గ్రావెల్ అక్రమ తవ్వకాల కేసుకు సంబంధించి లోతైన దర్యాప్తు కోసం సిట్ అధికారులు కాకాణి గోవర్ధన్రెడ్డిని కస్టడీలోకి తీసుకుని ప్రశ్నించారు. సిట్ డీఎస్పీ రామాంజనేయులు నేతృత్వంలోని బృందం ఈ విచారణను చేపట్టింది. రెండు రోజుల పాటు సాగిన ఈ విచారణలో కేసుకు సంబంధించిన పలు కీలక అంశాలపై ఆయన్ను ప్రశ్నించినట్లు తెలుస్తున్నప్పటికీ, ఆయన నుంచి ఎలాంటి స్పందన రాలేదని విశ్వసనీయ వర్గాల సమాచారం. కస్టడీ గడువు ముగియడంతో ఆయనను తిరిగి జ్యుడిషియల్ రిమాండ్కు తరలించారు.
