బోరుగడ్డ అనిల్ కు సుప్రీంకోర్టులో చుక్కెదురు

వైసీపీ మద్దతుదారుడు, రౌడీషీటర్ బోరుగడ్డ అనిల్ కు సుప్రీంకోర్టులో తీవ్ర నిరాశ ఎదురైంది. బోరుగడ్డ అనిల్ కు మధ్యంతర బెయిల్ ఇచ్చేందుకు సుప్రీం కోర్టు నిరాకరించింది. గతంలో మధ్యంతర బెయిల్ పొందిన సమయంలో న్యాయస్థానాన్ని తప్పుదోవ పట్టించే విధంగా వ్యవహరించారనే కారణంతో ఈ పిటిషన్‌ను కొట్టివేసినట్లు తెలుస్తోంది.

ఈ వ్యవహారాన్ని ఆంధ్రప్రదేశ్ హైకోర్టులోనే తేల్చుకోవాలని సుప్రీంకోర్టు ధర్మాసనం స్పష్టం చేసింది. దీంతో బెయిల్ కోసం బోరుగడ్డ అనిల్ మళ్లీ హైకోర్టును ఆశ్రయించాల్సిన పరిస్థితి ఏర్పడింది. సుప్రీంకోర్టు ఆదేశాలతో ఆయనకు తక్షణ ఉపశమనం లభించే అవకాశాలు మూసుకుపోయినట్లయింది.

మరోవైపు, ముఖ్యమంత్రి చంద్రబాబు నాయుడు కుటుంబ సభ్యులపై అనుచిత వ్యాఖ్యలు చేశారనే ఆరోపణలతో నమోదైన కేసు విచారణ కూడా కొనసాగుతోంది. 2023లో తెలుగుదేశం పార్టీ నాయకురాలు తేజస్విని ఇచ్చిన ఫిర్యాదు ఆధారంగా పోలీసులు ఈ కేసు నమోదు చేశారు. ఈ కేసుకు సంబంధించి బోరుగడ్డ అనిల్‌ను పోలీసులు ఇటీవలే అనంతపురం కోర్టులో హాజరుపరిచారు.