రేణూ దేశాయ్ ఆనందం... ఎందుకో తెలుసా...?

సోషల్ మీడియాలో ఎప్పుడూ యాక్టివ్‌గా ఉంటూ తన అభిరుచులను నెటిజన్లతో పంచుకునే ప్రముఖ సినీ నటి రేణూ దేశాయ్.. తాజాగా షేర్ చేసిన ఓ ఆసక్తికర వీడియో సోషల్ మీడియాలో వైరల్ అయ్యింది. తాను ఈ రోజు చాలా ఆనందంగా ఉన్నానని, ఈ క్షణాలను ఎప్పటికీ మర్చిపోలేనని ఆమె చెప్పుకొచ్చారు. అసలు రేణూ దేశాయ్ ఇంత ఆనందంగా ఉండటానికి కారణం ఏమిటి అంటే.. ఆ వీడియోలో రేణూ దేశాయ్ ఏమని అన్నారో ఒక సారి తెలుసుకుంటే..

ఈ రోజు కోసం ఎన్ని సంవత్సరాలుగా ఎదురుచూస్తున్నానో తనకు మాత్రమే తెలుసునని అన్నారు. తాను ఎనిమిదేళ్ల వయసు నుంచి మూగ జీవాలపై మక్కువతో వాటిని సంరక్షిస్తూ వస్తున్నాను కానీ ఈ విషయం గురించి బయటకు చెప్పాలని, ప్రచారం చేసుకోవాలని ఎప్పుడూ భావించలేదన్నారు. మూగ జీవాలకు ఒక షెల్టర్ ఏర్పాటు చేయాలని వాటి కోసం పెద్దగా మాట్లాడాలని కానీ ఆలోచించలేదన్నారు. అయితే కరోనా సమయంలో మూగ జీవాల  కోసం ఏదైనా చేయాలని తనకు అనిపించిందన్నారు. 

ఆ క్రమంలో వాటి కోసం సొంతంగా ఎన్జీవో స్థాపించాలని తను అనుకున్నానని, ఫైనల్‌గా ఆ కోరిక నేడు నెరవేరిందని చెప్పారు. అందుకు తనకు చాలా ఆనందంగా ఉందని పేర్కొన్నారు. తాను ఎన్జీవోను రిజిస్టర్ చేయించానని, మూగ జీవాలపై ఇష్టం ఉండి ఆర్ధిక సాయం చేయాలనుకునే వారు తమ ఎన్జీవోకు విరాళాలు ఇవ్వాలని రేణూ దేశాయ్ విజ్ఞప్తి చేశారు. ఈ వీడియో ప్రస్తుతం సోషల్ మీడియాలో వైరల్ అవుతోంది. మూగ జీవాల కోసం ఆమె తీసుకున్న నిర్ణయానికి అభిమానులు, నెటిజన్లు అభినందిస్తున్నారు.