Yashasvi Jaiswal: విశాఖ టెస్టులో యశస్వి జైస్వాల్ సెంచరీ

టీమిండియా యువ కిశోరం యశస్వి జైస్వాల్ సెంచరీతో సత్తా చాటాడు. విశాఖలో ఇంగ్లండ్ తో రెండో టెస్టులో తొలి రోజు లంచ్ అనంతరం సెషన్ లోనే జైస్వాల్ సెంచరీ పూర్తి చేసుకోవడం విశేషం. 

ఈ మ్యాచ్ లో టాస్ గెలిచిన టీమిండియా బ్యాటింగ్ ఎంచుకుంది. కెప్టెన్ రోహిత్ శర్మ, యశస్వి జైస్వాల్ ఓపెనర్లుగా దిగారు. జైస్వాల్ 151 బంతుల్లో 100 పరుగులు సాధించాడు. టెస్టుల్లో ఈ లెఫ్ట్ హ్యాండర్ కు ఇది రెండో సెంచరీ. జైస్వాల్ ఓ సిక్స్ తో సెంచరీ పూర్తి చేసుకోవడం హైలైట్ గా నిలిచింది. 

ప్రస్తుతం టీమిండియా స్కోరు 58 ఓవర్లలో 3 వికెట్లకు 207 పరుగులు. సెంచరీ హీరో జైస్వాల్ 119 పరుగులతోనూ, కొత్త బ్యాట్స్ మన్ రజత్ పాటిదార్ 13 పరుగులతోనూ ఆడుతున్నారు. జైస్వాల్ స్కోరులో 13 ఫోర్లు, 3 సిక్సులు ఉన్నాయి. కెప్టెన్ రోహిత్ శర్మ 14, శుభ్ మాన్ గిల్ 34, శ్రేయాస్ అయ్యర్ 27 పరుగులు చేశారు. 

ఇంగ్లండ్ బౌలర్లలో జేమ్స్ ఆండర్సన్ 1, టామ్ హార్ట్ లే 1, షోయబ్ బషీర్ 1 వికెట్ తీశారు.