Kapil Dev: 'లాల్ సలామ్' చిత్రం కోసం డబ్బింగ్ పూర్తి చేసిన క్రికెట్ లెజెండ్ కపిల్ దేవ్

తమిళ తలైవర్ రజనీకాంత్ కుమార్తె ఐశ్వర్య రజనీకాంత్ దర్శకత్వంలో తెరకెక్కుతున్న పాన్ ఇండియా చిత్రం 'లాల్ సలామ్'. ఈ చిత్రంలో రజనీకాంత్ 'మొయిద్దీన్ భాయ్' అనే ముఖ్య పాత్రలో నటిస్తున్నారు. 

కాగా, ఈ చిత్రంలో క్రికెట్ దిగ్గజం కపిల్ దేవ్ కూడా ఓ పాత్ర పోషిస్తుండడం విశేషం. తన పాత్ర కోసం కపిల్ స్వయంగా డబ్బింగ్ చెప్పారు. తాజాగా కపిల్ డబ్బింగ్ పూర్తయింది. ఈ మేరకు చిత్ర నిర్మాణ సంస్థ లైకా ప్రొడక్షన్స్ వెల్లడించింది. ప్రస్తుతం 'లాల్ సలామ్' చిత్రం పోస్ట్ ప్రొడక్షన్ పనులు జోరుగా సాగుతున్నాయని తెలిపింది. 

2024 సంక్రాంతి సందర్భంగా ఈ చిత్రం ప్రేక్షకుల ముందుకు రానుంది. తమిళం, తెలుగు, కన్నడ, మలయాళం, హిందీ భాషల్లో ఈ చిత్రం విడుదల కానుంది. ఇందులో విష్ణు విశాల్, విక్రాంత్, జీవితా రాజశేఖర్, అనసూయ, తంబిరామయ్య తదితరులు నటిస్తున్నారు. ఏఆర్ రెహ్మాన్ సంగీతం అందిస్తున్నారు.