Amitabh Bachchan: బాబ్బాబు.. ఈ ఒక్క మ్యాచ్‌కు దూరంగా ఉండరా?.. అమితాబ్‌ను వేడుకుంటున్న టీమిండియా అభిమానులు

ప్రపంచకప్ బిగ్ ఫైనల్‌కు మరొక్క రోజు మాత్రమే ఉంది. ఈ మ్యాచ్ కోసం ప్రపంచవ్యాప్తంగా ఉన్న క్రికెట్ అభిమానులు ఆసక్తిగా ఎదురుచూస్తున్నారు. ఇక, హోటళ్లు, రెస్టారెంట్లతోపాటు కూడళ్లలో బిగ్ స్క్రీన్లు కూడా ఏర్పాటు చేస్తున్నారు. టీమిండియా ముచ్చటగా మూడోసారి ప్రపంచకప్ కొట్టాలని కోరుకుంటున్న అభిమానులు బాలీవుడ్ బిగ్‌బీ అమితాబ్‌ను ఓ పెద్ద కోరికే కోరుతున్నారు. దయచేసి ఆయన ఈ మ్యాచ్ చూడొద్దని, తమ కోసం త్యాగం చేయాలని కోరుతున్నారు. దీని వెనక ఓ కారణం కూడా ఉంది. ఆయన కనుక మ్యాచ్‌ను వీక్షిస్తే భారత్ ఓడిపోతుందని వారు భావిస్తున్నారు. అందుకనే తమ కోసం ఈ మ్యాచ్‌కు దూరంగా ఉండి త్యాగం చేయాలని కోరుతున్నారు.

సెమీఫైనల్‌లో న్యూజిలాండ్‌పై విజయం సాధించిన తర్వాత అమితాబ్ తన ఎక్స్ ఖాతా ద్వారా స్పందిస్తూ.. తాను చూడకపోతేనే మనం గెలుస్తామని చెప్పారు. ఇది కాస్తా వైరల్ అవడంతో అభిమానులు పైవిధంగా స్పందిస్తున్నారు. దయచేసి ఈ ఒక్కసారి జట్టు కోసం త్యాగం చేయాలని విజ్ఞప్తి చేస్తున్నారు. వెల్లువెత్తుతున్న అభ్యర్థనలపై అమితాబ్ తాజాగా స్పందిస్తూ.. ఈ మ్యాచ్‌కు వెళ్లాలా? వద్దా? అని ఆలోచిస్తున్నట్టు చెప్పుకొచ్చారు.