Modi: ప్రధానిగా మోదీ పాలనకు తొమ్మిదేళ్లు.. దేశవ్యాప్తంగా సంబరాలకు బీజేపీ ఏర్పాట్లు

దేశ ప్రధానిగా నరేంద్ర మోదీ ప్రమాణం చేసి శుక్రవారం నాటికి తొమ్మిదేళ్లు.. 2014 మే 26న ప్రధానమంత్రి పదవి చేపట్టిన మోదీ, 2019లో మే 30 న రెండోసారి ప్రమాణ స్వీకారం చేశారు. ఈ నేపథ్యంలో బీజేపీ దేశవ్యాప్తంగా సంబరాలకు ఏర్పాట్లు చేసింది. ఇక ప్రధాని నరేంద్ర మోదీ గురించి చాలామందికి తెలియని కొన్ని ఆసక్తికర విషయాలు.. 

• దేశానికి ప్రధానమంత్రిగా ఇప్పటి వరకు సేవలందించిన వారిలో నరేంద్ర మోదీ మాత్రమే స్వాతంత్ర్యానంతరం పుట్టారు. అంతకుముందు ప్రధానమంత్రులంతా మన దేశానికి స్వాతంత్ర్యం రాకముందు జన్మించిన వారే. ఎక్కువ కాలం ముఖ్యమంత్రిగా చేసి, ప్రధానిగానూ సేవలందించిన లీడర్ మోదీ ఒక్కరే!
• ఎమర్జెన్సీ సమయంలో అరెస్టును తప్పించుకోవడానికి, అరెస్టయిన అగ్రనేతలకు సమాచారం అందించడానికి మోదీ సిక్కు యువకుడిలా వేషం ధరించి పోలీసులను బోల్తా కొట్టించారు.
• చిన్నతనంలో మోదీ టీ అమ్మారని చాలామందికి తెలిసిందే. రైల్వే స్టేషన్ లోని టీ స్టాల్ లో తండ్రికి ఆయన సాయం చేసేవారు. ఇంటికి మరమ్మతులు చేయించడానికి అవసరమైన డబ్బు కోసం మోదీ నాటకాలలో పాల్గొన్నారు.
• భారతీయ జనతా పార్టీతో జతకట్టడానికి ముందు మోదీ పూర్తిస్థాయి ఆరఎస్ఎస్ ప్రచారక్ గా పనిచేశారు.
• ఎనిమిదేళ్ల వయసులోనే రాష్ట్రీయ స్వయం సేవక్ సంఘ్ (ఆర్ఎస్ఎస్) గురించి తెలుసుకున్న మోదీ.. లక్ష్మణ్ రావు ఇనామ్ దార్ ను కలుసుకున్నారు. ఆయన మోదీని జూనియర్ క్యాడెట్ గా చేర్చారు.
• శాసన సభలో సభ్యత్వంలేకున్నా 2001 లో గుజరాత్ ముఖ్యమంత్రిగా మోదీ ప్రమాణస్వీకారం చేశారు.
• దేశంలో రెండోసారి స్పష్టమైన మెజారిటీతో బాధ్యతలు చేపట్టిన ప్రధానులు ఇందిరాగాంధీ, మోదీ ఇద్దరే!
• ప్రధాని మోదీ పలు పుస్తకాలను ప్రచురించారు. పద్యాలు రాయడమన్నా, ఫొటోగ్రఫీ అన్నా ఆయనకు చాలా ఇష్టం. 
• ఫోర్బ్స్ మ్యాగజైన్ జాబితాలో 2018లో అత్యంత శక్తిమంతమైన వ్యక్తిగా ప్రధాని మోదీ తొమ్మిదో స్థానంలో నిలిచారు.