Kalyan Ram: కొరటాల మూవీ షూటింగు ఎప్పటి నుంచి ఉంటుందంటే ..!: ఎన్టీఆర్

కల్యాణ్ రామ్ సినిమా 'అమిగోస్' ప్రీ రిలీజ్ ఈవెంట్ నిన్న రాత్రి గ్రాండ్ గా జరిగింది. ఈ ఫంక్షన్ కి ముఖ్య అతిథిగా వచ్చిన ఎన్టీఆర్ కాస్త నలతగానే కనిపించారు. తనకి ఒంట్లో బాగోలేదంటూనే ఆయన తన స్పీచ్ ను మొదలుపెట్టారు. అభిమానుల ఈలలు .. గోలల పట్ల కాస్త అసహనాన్ని ప్రదర్శించారు. 

కొరటాలతో సినిమా సంగతి చెప్పమని అభిమానులు అడిగితే, ఆయన వారికి సున్నితంగానే చిన్నపాటి క్లాస్ పీకారు. 'ఎప్పుడూ అప్ డేట్స్ ఇవ్వడానికి ఏముంటాయి?' అంటూ చిరాకును వ్యక్తం చేశారు. తాను మాత్రమే కాదు ఈ విషయంలో హీరోలంతా ఇబ్బంది పడుతున్నారని .. అర్థం చేసుకోమని అన్నారు.

"ఒక మంచి అకేషన్ చూసి చెబుదామని అనుకున్నాను ..  అలాంటి అవకాశం వచ్చింది గనుక చెబుతున్నాను. ఈ నెలలో కొరటాల ప్రాజెక్టును లాంచ్ చేసి .. మార్చి 21 .. 22 తేదీలలో షూటింగును మొదలుపెడతాము. 2024 ఏప్రిల్ 5వ తేదీన ఈ సినిమాను విడుదల చేస్తాం" అంటూ క్లారిటీ ఇచ్చారు. ఆ మాటలతో అక్కడి వాతావరణం మరింత సందడిగా మారిపోయింది.