బ్యాంకును దోచేసి, తప్పించుకునేందుకు ప్లాస్టిక్ సర్జరీ... కానీ...!

23-01-2023 Mon 20:39 | International
  • చైనాలోని యెకింగ్ నగరంలో ఘటన
  • సాంకేతిక లోపం ఆధారంగా తన ఖాతాలోకి భారీగా నగదు జమ
  • నగదు డ్రా చేసి తప్పించుకున్న మహిళా ఉద్యోగి
  • ప్లాస్టిక్ సర్జరీతో రూపం మార్చుకున్న వైనం
  • మరో ప్రావిన్స్ కు వెళ్లి పెళ్లి చేసుకుని స్థిరపడిన మహిళ
China woman was caught after a fraud in Bank
సినిమాకు ఏమాత్రం తీసిపోని రీతిలో చైనాలో ఓ బ్యాంకు క్లర్క్ తాను పనిచేస్తున్న సంస్థకే కన్నం వేసింది... తప్పించుకోవడానికి ప్లాస్టిక్ సర్జరీ కూడా చేయించుకుంది... కానీ పాతికేళ్ల తర్వాత పోలీసులకు పట్టుబడింది. 

చెన్ వైల్ అనే మహిళ యెకింగ్ నగరంలో చైనా కన్ స్ట్రక్షన్ బ్యాంకులో క్లర్కుగా పనిచేసేది. బ్యాంకు గుట్టుమట్లన్నీ గుర్తించిన ఆమె... ఓ లోపాన్ని ఆధారంగా చేసుకుని, తన ఖాతాలో లేని సొమ్మును ఉన్నట్టుగా సాంకేతిక మార్పులు చేసింది. తన ఖాతాలో భారీమొత్తం జమ అయినట్టుగా ఎడిట్ చేసింది. ఆ తర్వాత తన ఖాతా నుంచి డబ్బును డ్రా చేసుకుంది. వెంటనే ఆసుపత్రికి వెళ్లి ప్లాస్టిక్ సర్జరీతో కొత్త రూపాన్ని పొందింది. 

కాగా, తాను మోసపూరితంగా పొందిన డబ్బులో కొంత తన పుట్టింటివారు కూడా తీసుకునేలా తన అకౌంట్ పుస్తకాలను వారికి అందుబాటులో ఉంచింది. అయితే, అంత భారీ మొత్తంలో డబ్బు ఆమె ఖాతాలో ఉండడంపై పుట్టింటివారు అనుమానించారు. అసలు విషయం తెలుసుకుని ఆమెను మందలించారు. ఇదంతా 1997లో జరిగింది. 

ఈ నేపథ్యంలో, చెన్ వైల్ మరో ప్రావిన్స్ కు తన మకాం మార్చింది. అక్కడ పేరు మార్చుకోవడమే కాదు, పెళ్లి కూడా చేసుకుని ఓ అమ్మాయికి జన్మనిచ్చింది. ఆమెకు గతంలో ఓసారి పెళ్లయినా, ఆ విషయాలేవీ చెప్పకుండా, కొత్త రూపురేఖలతో రెండో పెళ్లి చేసుకుంది. కాలక్రమంలో ఆమె వ్యాపారవేత్తగా ఎదిగింది. 

అయితే, పోలీసులు 1997 నుంచి ఆమె కోసం వెదుకుతూనే ఉన్నారు. ఏమైతేనేం, ఇటీవల ఆమెను అరెస్ట్ చేశారు. ఆమెపై పలు అభియోగాలతో కేసులు నమోదు చేశారు.