Pawan Kalyan: 'హరిహర వీరమల్లు' పోరాట సన్నివేశాల కోసం పవన్ కల్యాణ్ ప్రాక్టీస్

పవర్ స్టార్ పవన్ కల్యాణ్ హీరోగా క్రిష్ దర్శకత్వంలో తెరకెక్కుతున్న 'హరిహర వీరమల్లు' చిత్రం త్వరలోనే నూతన షెడ్యూల్ లో అడుగుపెడుతోంది. ఈ షెడ్యూల్ లో చిత్రీకరించే సన్నివేశాలకు సంబంధించి గత కొన్నిరోజులుగా 'హరిహర వీరమల్లు' చిత్రబృందం హైదరాబాదులో వర్క్ షాప్ నిర్వహిస్తోంది. ఈ వర్క్ షాప్ కు పవన్ కల్యాణ్ కూడా హాజరవుతున్నారు. 

తాజాగా, ఈ పీరియాడిక్ చిత్రానికి సంబంధించిన పోరాట సన్నివేశాల రిహార్సల్స్ జరుగుతున్నాయి. పవన్ కల్యాణ్ కూడా తన సీన్లకు సంబంధించి ప్రాక్టీస్ లో పాల్గొన్నారు. ఈ మేరకు ఓ ఫొటోను చిత్ర నిర్మాణ సంస్థ మెగా సూర్య ప్రొడక్షన్స్ సోషల్ మీడియాలో పంచుకుంది. తలను కూడా కవర్ చేసేలా డ్రెస్ ధరించి ఉన్న పవన్ కల్యాణ్ ఫైటింగ్ కు రెడీ అవుతుండడాన్ని ఆ ఫొటోలో చూడొచ్చు. 

కాగా, 'హరిహర వీరమల్లు' చిత్రంలో పవన్ సరసన నిధి అగర్వాల్ కథానాయికగా నటిస్తోంది. ఈ చిత్రానికి ఎంఎం కీరవాణి సంగీతం అందిస్తున్నారు. ఈ భారీ చిత్రం వచ్చే ఏడాది వేసవిలో రిలీజ్ అవుతుందని వార్తలు వస్తున్నాయి.