Brahmastra: రెండు రోజుల్లోనే బ్రహ్మాస్త్ర రూ.160 కోట్ల వసూళ్లు.. నిజమేనా..?
- సినిమా అధికారిక ట్విట్టర్ పేజీలో ఇమేజీ పోస్ట్
- తమిళనాడులో వసూళ్ల పరంగా రికార్డు
- మొదటి రోజు రూ.1.20 కోట్ల ఆదాయం
బ్రహ్మాస్త్ర రూపంలో బాలీవుడ్ బాక్సాఫీసుపై మరో పిడుగు.. అంటూ పలు కథనాలు రాగా, వాటికి భిన్నంగా సినిమా కలెక్షన్లు జోరుగానే సాగుతున్నాయి. మొదటి రెండు రోజుల్లోనే రూ.160 కోట్ల ఆదాయాన్ని ఈ సినిమా వసూలు చేసినట్టు సమాచారం. వారాంతానికి రూ.250 కోట్లను చేరుకుంటుందన్న అంచనాలు నెలకొన్నాయి.
బ్రహ్మాస్త్ర సినిమా అధికారిక ట్విట్టర్ పేజీ.. రెండు రోజుల్లో బాక్సాఫీసు రూ.160 కోట్ల వసూళ్లను నమోదు చేసిందంటూ ఓ గ్రాఫిక్ ఇమేజ్ ను పోస్ట్ చేసింది. హిందీ వెర్షన్ కు డబ్బింగ్ గా తమిళనాడులో విడుదల కాగా, అక్కడ కూడా బ్రహ్మాస్త్ర రికార్డులు తిరగరాస్తోంది. 1.20 కోట్లను మొదటి రోజే రాబట్టింది. తమిళనాట ఓ బాలీవుడ్ సినిమాకు వచ్చిన మొదటి రోజు అత్యధిక ఆదాయం ఇదేనట. ఈ సినిమాను తమిళ్, తెలుగు, మలయాళం, కన్నడలోనూ విడుదల చేశారు.
రణబీర్ కపూర్, అలియాభట్, మౌనీరాయ్ నటించిన ఈ సినిమాను ప్రముఖ దర్శకుడు రాజమౌళి సమర్పించారు. అక్కినేని నాగార్జున సైతం ఈ సినిమాలో ఓ పాత్రను పోషించారు. బ్రహ్మాస్త్ర రెండో వారంలోనూ ఇదే మాదిరి వసూళ్లు కొనసాగిస్తుందా? అన్నది చూడాలి.
