జోరు చూపుతున్న 'శ్యామ్ సింగ రాయ్'

రాహుల్ సాంకృత్యన్ దర్శకత్వంలో 'శ్యామ్ సింగ రాయ్' సినిమా రూపొందింది. వెంకట్ బోయనపల్లి నిర్మించిన ఈ సినిమా, ఈ నెల 24వ తేదీన థియేటర్లకు వచ్చింది. ఈ సినిమాలో వాసు - శ్యామ్ సింగ రాయ్ అనే రెండు విభిన్నమైన పాత్రలలో నాని నటించాడు. ఈ రెండు పాత్రల జోడీలుగా సాయిపల్లవి .. కృతి శెట్టి మెప్పించారు.

ఒక వైపున ఒక రేంజ్ లో 'పుష్ప' దూకుడు కొనసాగుతుండటంతో, నాని సినిమా ఏ స్థాయి వసూళ్లను రాబడుతుందా అనే ఆసక్తి అందరిలో నెలకొంది. అయితే, 'పుష్ప' పోటీని తట్టుకుని 'శ్యామ్ సింగ రాయ్' నిలబడిందనే వార్తలు వినిపిస్తున్నాయి. మూడు రోజుల్లో తెలుగు రాష్ట్రాల్లో 16 కోట్ల గ్రాస్ ను 10 కోట్ల షేర్ ను వసూలు చేసిందని అంటున్నారు.

ఇక ప్రపంచవ్యాప్తంగా చూసుకుంటే 24 కోట్ల గ్రాస్ .. 14 కోట్ల షేర్ ను రాబట్టినట్టుగా చెబుతున్నారు. ఇప్పుడున్న పరిస్థితుల్లో .. అందునా 'పుష్ప' థియేటర్స్ లో ఉన్న ఈ సమయంలో ఈ సినిమా ఈ స్థాయి వసూళ్లను రాబట్టడం గొప్ప విషయమేనని అంటున్నారు. లాంగ్ రన్ లో చెప్పుకోదగిన మార్క్ ను ఈ సినిమా టచ్ చేస్తుందేమో చూడాలి.