Curtis Campher: టీ20 వరల్డ్ కప్: వరుసగా 4 బంతుల్లో 4 వికెట్లు తీసిన ఐర్లాండ్ బౌలర్
- హ్యాట్రిక్ నమోదు చేసిన కాంఫర్
- ఆ తర్వాత బంతికి మరో వికెట్
- 106 పరుగులకే కుప్పకూలిన నెదర్లాండ్స్
- 51 పరుగులు చేసిన ఓడౌడ్
టీ20 వరల్డ్ కప్ తొలిదశ పోటీల్లో అద్భుత బౌలింగ్ స్పెల్ నమోదైంది. ఐర్లాండ్ యువ పేసర్ కర్టిస్ కాంఫర్ నెదర్లాండ్స్ పై వరుసగా 4 బంతుల్లో 4 వికెట్లు తీసి ఔరా అనిపించాడు. 22 ఏళ్ల కర్టిస్ కాంఫర్ తొలుత అకెర్మన్ (11) ను అవుట్ చేశాడు. ఆ తర్వాత సీనియర్ ఆటగాడు ర్యాన్ టెన్ డష్కాటేను వికెట్ల ముందు దొరకబుచ్చుకున్నాడు. ఆపై అదే తరహాలో బంతి వేసి స్కాట్ ఎడ్వర్డ్స్ ను కూడా ఎల్బీడబ్ల్యూ చేసి హ్యాట్రిక్ సాధించాడు. అంతేకాదు, ఆ తర్వాత బంతికి రైలోఫ్ వాన్ డెర్ మెర్వ్ ను బౌల్డ్ చేసి తన నాలుగో వికెట్ ను ఖాతాలో వేసుకున్నాడు. కాంఫర్ ఈ నలుగురిలో ముగ్గుర్ని డకౌట్ చేశాడు.
ఇక, మార్క్ అడైర్ విసిరిన ఇన్నింగ్స్ చివరి ఓవర్లో నెదర్లాండ్స్ ఆఖరి మూడు వికెట్లను కోల్పోయింది. మొత్తానికి ఓవర్లన్నీ ఆడి 106 పరుగులకు ఆలౌట్ అయింది. కాంఫర్ కు 4, అడైర్ కు 3 వికెట్లు, జాషువా లిటిల్ కు 1 వికెట్ లభించాయి. నెదర్లాండ్స్ ఇన్నింగ్స్ లో ఓపెనర్ మాక్స్ ఓడౌడ్ సాధించిన 51 పరుగులే అత్యధికం. ఆ జట్టులో ఐదుగురు డకౌట్ అయ్యారు.
కాగా, అంతర్జాతీయ టీ20 క్రికెట్లో నాలుగు బంతుల్లో నాలుగు వికెట్లు తీసిన బౌలర్లలో కర్టిస్ కాంఫర్ మూడోవాడు. గతంలో రషీద్ ఖాన్ (ఆఫ్ఘనిస్థాన్), లసిత్ మలింగ (శ్రీలంక) ఈ ఘనత సాధించారు.
