భారీ వర్షంతో అతలాకుతలమైన హైదరాబాద్.. మరోసారి వర్షసూచన

08-10-2021 Fri 22:23
  • హైదరాబాదులో మళ్లీ వాన
  • లోతట్టు ప్రాంతాలు జలమయం
  • చెరువుల్లా మారిన రోడ్లు
  • వాహనదారులకు తీవ్ర ఇబ్బందులు
  • అప్రమత్తమైన జీహెచ్ఎంసీ
Huge Rain lasehs Hyderabad again

ఇటీవల వరుసగా కొన్నిరోజుల పాటు అతి భారీ వర్షాలతో అస్తవ్యస్తమైన హైదరాబాద్ ను ఇవాళ మరోసారి భారీ వర్షం పలకరించింది. కుండపోతగా కురిసిన వానతో నగరం అతలాకుతలమైంది. దిల్ సుఖ్ నగర్, వనస్థలిపురం, ఎల్బీనగర్, జూబ్లీహిల్స్, హయత్ నగర్, ఓల్డ్ సిటీ, రాజేంద్రనగర్, శంషాబాద్, మణికొండ, బంజారాహిల్స్, మీర్ పేట, చంపాపేట, పెద్ద అంబర్ పేట, అనాజ్ పూర్, సైదాబాద్ ప్రాంతాల్లో భారీ వర్షం కురిసింది.

సుమారు రెండుగంటల పాటు ఏకబిగిన పడిన వర్షంతో లోతట్టు ప్రాంతాలు జలమయం అయ్యాయి. కాసేపటికే రోడ్లు చెరువుల్లా మారాయి. ట్రాఫిక్ కు తీవ్ర అంతరాయం ఏర్పడడంతో వాహనదారులు ఇబ్బందిపడ్డారు. భారీ వర్షంతో వెంటనే స్పందించిన జీహెచ్ఎంసీ సహాయ కార్యక్రమాలు, ఇతర సమాచారం కోసం 040 21111111 ఫోన్ నెంబరుతో కాల్ సెంటర్ ఏర్పాటు చేసింది.

జీహెచ్ఎంసీ మేయర్ గద్వాల్ విజయలక్ష్మి అధికారులను అప్రమత్తం చేసి తీసుకోవాల్సిన చర్యలపై దిశానిర్దేశం చేశారు. కాగా, మరో మూడ్రోజుల పాటు వర్షాలు పడతాయని వాతావరణ శాఖ పేర్కొంది.