ముఖేశ్ అంబానీ ఇంటికి సమీపంలో పేలుడు పదార్థాలు... అప్రమత్తమైన పోలీసులు

25-02-2021 Thu 21:18
  • స్కార్పియో వాహనంలో పేలుడు పదార్థాలు
  • గుర్తించిన అంబానీ సెక్యూరిటీ సిబ్బంది
  • పోలీసులకు సమాచారం అందించిన వైనం
  • హుటాహుటీన వచ్చిన బాంబు డిస్పోజల్ స్క్వాడ్లు
  • వాహనంలో జిలెటిన్ స్టిక్స్ ఉన్నాయన్న మహారాష్ట్ర హోంమంత్రి
Vehicle identified with explosives near Mukesh Ambani residence Antilla

భారత వ్యాపార దిగ్గజం ముఖేశ్ అంబానీ నివాసం వద్ద పేలుడు పదార్థాల కలకలం రేగింది. ముంబయిలోని అంబానీ నివాసం యాంటిల్లాకు సమీపంలో పేలుడు పదార్థాలతో కూడిన ఓ స్కార్పియో వాహనం తీవ్ర ఆందోళన రేకెత్తించింది. ఈ వాహనాన్ని గుర్తించిన ముఖేశ్ అంబానీ సెక్యూరిటీ సిబ్బంది వెంటనే పోలీసులను అప్రమత్తం చేశారు. హుటాహుటీన అక్కడికి చేరుకున్న బాంబు డిస్పోజల్ స్క్వాడ్లు వాహనాన్ని, పరిసరాలను తనిఖీ చేశాయి.

దీనిపై మహారాష్ట్ర హోంమంత్రి అనిల్ దేశ్ ముఖ్ స్పందిస్తూ, ఆ వాహనంలో జిలెటిన్ స్టిక్స్ ఉన్నట్టు తేలిందని వెల్లడించారు. దీనిపై ముంబయి క్రైమ్ బ్రాంచ్ పోలీసులు కేసు నమోదు చేసుకున్నారని, దర్యాప్తులో మరిన్ని వివరాలు తెలుస్తాయని పేర్కొన్నారు. కాగా, ఆ వాహనాన్ని అక్కడ ఎవరు పార్క్ చేశారన్నదానిపై పోలీసులు అక్కడి సీసీ టీవీ కెమెరాల ఫుటేజిని పరిశీలించనున్నారు.