ప్రభుత్వ భూముల అమ్మకంపై పిటిషన్.. ఆసక్తికర వ్యాఖ్యలు చేసిన ఏపీ హైకోర్టు

18-09-2020 Fri 19:38
AP High Court interesting comments during hearing of Mission Build AP petition
  • మిషన్ బిల్డ్ ఏపీ కింద భూముల విక్రయంపై పిటిషన్
  • ప్రతి పనికి అడ్డు తగులుతున్నారన్న ఏఏజీ
  • ఎవరి గురించి మాట్లాడారని ప్రశ్నించిన జస్టిస్ రాకేశ్ కుమార్

మిషన్ బిల్డ్ ఏపీ కింద ప్రభుత్వ ఆస్తులను విక్రయించడాన్ని సవాల్ చేస్తూ గుంటూరుకు చెందిన సామాజిక కార్యకర్త తోట సురేశ్ బాబు వేసిన పిటిషన్ ను ఏపీ హైకోర్టు ఈరోజు విచారించింది. ఈ పిటిషన్ ను జస్టిస్ రాకేశ్ కుమార్, జస్టిస్ ఉమాదేవితో కూడిన ధర్మాసనం విచారించింది.

ఈ సందర్భంగా ప్రభుత్వం తరపున ఏఏజీ వాదిస్తూ... ప్రతి పనికి అడ్డు తగులుతున్నారని... పరిపాలనను కూడా వారినే చేసుకోమనండి అని వ్యాఖ్యానించారు. ఈ వ్యాఖ్యలపై జస్టిస్ రాకేశ్ కుమార్ వెంటనే స్పందించారు. 'మీరు ఎవరిని ఉద్దేశించి మాట్లాడారు? హైకోర్టునా? పిటిషనర్ నా?' అని ప్రశ్నించారు. అన్ని విషయాలను కూలంకుషంగా విచారించి తీర్పును చెప్పడానికి విచారణను అక్టోబర్ 16కు వాయిదా వేస్తున్నట్టు ప్రకటించారు. ఈ కేసులో ప్రతివాదులుగా ఉన్న అన్ని శాఖల కార్యదర్శులు కౌంటర్లు దాఖలు చేయాలని ఆదేశించారు.