Asaduddin Owaisi: ప్రధానమంత్రి కార్యాలయంపై ప్రశ్నల వర్షం కురిపించిన అసదుద్దీన్ ఒవైసీ

ప్రధానమంత్రి నరేంద్ర మోదీ నిన్న ఢిల్లీ నుంచి వీడియో కాన్ఫరెన్స్ ద్వారా అఖిలపక్ష నేతలతో సమావేశమయ్యారు. ఈ సందర్భంగా ఆయన మాట్లాడుతూ, చైనా ఎలాంటి దురాక్రమణ జరపలేదని అన్నారు. దీనిపై విపక్షాలు తీవ్ర విమర్శలు గుప్పిస్తున్నాయి. చైనా ఎలాంటి దురాక్రమణ జరపకపోతే ఇంతమంది సైనికులు ఎందుకు చనిపోయినట్టని నేతలు ప్రశ్నిస్తున్నారు. తాజాగా ఎంఐఎం అధినేత అసదుద్దీన్ ఒవైసీ ఈ విషయంలో ఘాటుగా స్పందించారు. ప్రధానమంత్రి కార్యాలయంపై విమర్శలు గుప్పించారు.

"మన భూభాగంలో చైనా చొరబడలేదని ప్రధానమంత్రి కార్యాలయం చెబుతోంది. ఈ క్రమంలో కొంత అయోమయం కలుగుతోందని, అందుకే కొన్ని ప్రశ్నలు అడుగుతున్నాను" అంటూ ట్వీట్ చేశారు.

• చైనా బలగాలను మన భూభాగం నుంచి తరిమికొట్టే ప్రయత్నంలో కాకపోతే మరి ఎందుకు మనవాళ్లు 20 మంది చనిపోవాల్సి వచ్చింది?
• గాల్వన్ లోయ తమదేనని చైనా చెబుతోంది. గాల్వన్ లోయలో ఎలాంటి ఆక్రమణలు లేవని ప్రధాని మోదీ చెప్పడం చైనా వాదనను బలపర్చడం కాదా?
• గాల్వన్ లోయలో చైనా చొరబాట్లు లేవని, భారత ప్రాదేశిక భూభాగాన్ని ఎవరూ ఆక్రమించుకోలేదని చెబుతున్నప్పుడు, వాస్తవాధీన రేఖ వద్ద ఎలాంటి పరిస్థితినైనా ఎదుర్కోడానికి సిద్ధంగా ఉన్నామని భారత వాయుసేన చీఫ్ దేనికి ప్రకటించినట్టు?
• 20 మంది భారత సైనికులు మృతి చెందిన గాల్వన్ లోయలోని 14వ నెంబరు గస్తీ పోస్టు ఇప్పటికీ చైనా బలగాల అధీనంలోనే ఉందా? ఆ గస్తీ పోస్టు ఉన్న భూభాగం వాస్తవాధీన రేఖ వద్ద భారత్ వైపు ఉందా, లేక చైనా వైపు ఉందా?
• పాంగోంగ్ ట్సో సరస్సు పరిస్థితి ఏంటి? ఆ సరస్సుకు చెందిన ఎంత మేర భూభాగం ఇప్పుడు భారత్ పరిధిలో ఉంది?
• సైనికుల మరణం నేపథ్యంలో అయినా, గాల్వన్ లోయ, పాంగోంగ్ ట్సో సరస్సులతో కూడిన భారత భూభాగం అధికారిక మ్యాప్ లను విడుదల చేస్తారా?
• 2014 నుంచి 2020 జూన్ 16 వరకు లడఖ్ వద్ద ప్రాదేశిక భూభాగం పరిస్థితులపై శ్వేతపత్రం విడుదల చేయగలరా?

అంటూ ప్రశ్నలు సంధించారు. అంతేకాదు. ఏ ప్రధానమంత్రికి కూడా పార్లమెంటు ఆమోదం లేకుండా భారత భూభాగాన్ని ఇతర దేశాలకు అప్పగించే అధికారం లేదని అసదుద్దీన్ ఒవైసీ స్పష్టం చేశారు. నిన్న జరిగిన అఖిలపక్ష సమావేశానికి ఎంఐఎం పార్టీని ఆహ్వానించలేదని ఒవైసీ ఇదివరకే అసంతృప్తి వ్యక్తం చేశారు.