జాతినుద్దేశించి ప్ర‌సంగించ‌నున్న ప్రధాని మోదీ

కరోనా విజృంభణ నేపథ్యంలో దేశ వ్యాప్తంగా పలు చర్యలు తీసుకుంటున్న విషయం తెలిసిందే. అయినప్పటికీ దేశంలో క్రమంగా కరోనా పాజిటివ్ కేసుల సంఖ్య పెరిగిపోతోంది. దీంతో మరిన్ని కఠిన చర్యలు తీసుకోవాలన్న డిమాండ్ వినపడుతోంది. ఈ నేపథ్యంలో ప్ర‌ధానమంత్రి నరేంద్ర మోదీ ఈ రోజు రాత్రి 8 గంటలకు జాతిని ఉద్దేశించి ప్ర‌సంగించ‌నున్నారు.  

కరోనా వ్యాప్తి నిరోధానికి తీసుకోవాల్సిన జాగ్ర‌త్త‌లు, పరిస్థితులను ఎలా ఎదుర్కోవాల‌న్న అంశాల‌ను ఆయన చెబుతారని పీఎంవో ఇప్పటికే ప్రకటించింది. కరోనా వైరస్‌ వ్యాప్తిపై నిన్న ప్రధాని మోదీ ఉన్నతస్థాయి సమావేశం నిర్వహించారు.

ఈ నేపథ్యంలో పలువురు కీలక సూచనలు చేసినట్లు తెలుస్తోంది. అలాగే, కరోనాపై మరిన్న చర్యలు తీసుకునే అంశంపై కీలక ప్రకటన చేస్తారన్న ప్రచారం జరుగుతోంది. ఈ రోజు రాత్రి మోదీ ప్రసంగాన్ని ప్రజలందరూ తప్పకుండా వినాలంటూ బీజేపీ అగ్రనేతలు ట్వీట్లు చేస్తున్నారు. అన్ని చానెళ్లతో పాటు బీజేపీ సామాజిక మాధ్యమాల ఖాతాల్లోనూ మోదీ ప్రసంగాన్ని ప్రత్యక్ష ప్రసారం చేయనున్నారు.