'అర్జున్ రెడ్డి' దర్శకుడితో ప్రభాస్ 'డెవిల్'?

తెలుగులో కొంతకాలం క్రితం వచ్చిన 'అర్జున్ రెడ్డి' సంచలన విజయాన్ని నమోదు చేసింది. ఆ సినిమాతో దర్శకుడు సందీప్ రెడ్డి వంగా పాప్యులర్ అయ్యాడు. దాంతో బాలీవుడ్ నుంచి ఆయనకి అవకాశం వెతుక్కుంటూ వచ్చింది. 'అర్జున్ రెడ్డి' సినిమాను అక్కడ 'కబీర్ సింగ్' గా రీమేక్ చేసిన ఆయన, మరోసారి ఘన విజయాన్ని అందుకున్నాడు.

ఆ తరువాత అక్కడే ఆయన రణ్ బీర్ కపూర్ కోసం ఒక కథను సిద్ధం చేసుకున్నాడు. ఈ సినిమాకి 'డెవిల్' అనే టైటిల్ ను కూడా ఖరారు చేసుకున్నాడు. అయితే కొన్ని కారణాల వలన రణ్ బీర్ కపూర్ ఈ ప్రాజెక్టు పట్ల అంతగా ఆసక్తిని చూపలేదట. దాంతో సందీప్ రెడ్డి ఈ కథను ప్రభాస్ కి వినిపించగా, వెంటనే ఆయన గ్రీన్ సిగ్నల్ ఇచ్చేసినట్టుగా చెబుతున్నారు. ఇందులో వాస్తవమెంతన్నది తెలియాల్సి వుంది. ప్రస్తుతం ప్రభాస్ .. రాధాకృష్ణ దర్శకత్వంలోని సినిమా షూటింగులో బిజీగా వున్నాడు.