పుల్వామాలో మరో ఘాతుకం... ఆర్మీ వాహనంపై పేలుడు పదార్థాలతో ఉగ్రదాడి

జమ్ముకశ్మీర్ లోని పుల్వామాలో సీఆర్పీఎఫ్ కాన్వాయ్ పై ఉగ్రవాదులు జరిపిన ఘోర దాడిని ఇంకా మరువక ముందే... ముష్కరులు మరోసారి తెగబడ్డారు. ఆర్మీ వాహనాన్ని లక్ష్యంగా చేసుకున్న ఉగ్రవాదులు పేలుడు పదార్థాలతో దాడికి పాల్పడ్డారు. ఈ దాడిలో ఎవరైనా ప్రాణాలు కోల్పోయారా? అనే అంశానికి సంబంధించి ఇంకా సమాచారం వెలువడలేదు. దాడి జరిగిన వెంటనే ఆ ప్రాంతంలో ఎన్ కౌంటర్ ప్రారంభమైంది. ఫిబ్రవరిలో పుల్వామా ఉగ్రదాడి జరిగిన ప్రాంతానికి 27 కిలోమీటర్ల దూరంలో తాజా దాడి జరిగింది.

పుల్వామా జిల్లాలోని అరిహాల్ గ్రామం సమీపంలో ప్రయాణిస్తున్న 44 రాష్ట్రీయ రైఫిల్స్ కు చెందిన వాహనంపై ఈ దాడి జరిగింది. మనకు అందుతున్న సమాచారం ప్రకారం... ఈ దాడిలో ఒక వాహనం ధ్వంసమైంది. వెంటనే భారీ ఎత్తున కాల్పులు, రాళ్లు రువ్వడం ప్రారంభమైంది. అనంతనాగ్ లో ఉగ్రవాదులతో జరిగిన ఎదురు కాల్పుల్లో ఆర్మీ మేజర్ ప్రాణాలు కోల్పోయిన గంటల వ్యవధిలోనే... పుల్వామాలో ఈ ఘటన చోటు చేసుకోవడం గమనార్హం.