ఎంత అదృష్టం... 24 గంటల వ్యవధిలో మూడు లాటరీలు కొట్టిన అమెరికన్!

అదృష్టమంటే అతనిదే. సాధారణంగా ఒక లాటరీ తగిలితేనే అది ఎంతో సంబరపడాల్సిన విషయం. లక్ష్మీదేవి కటాక్షించిందని పొంగిపోతాం. అటువంటిది ఒకే రోజు మూడు లాటరీలు తగిలితే... న్యూయార్క్ కు చెందిన రాబర్ట్ స్టీవర్ట్ కు ఈ పరిస్థితే ఎదురైంది. ఆయన జీవితంలో అత్యంత శుభదినం, ఏకంగా మూడు లాటరీల్లో విజేతగా నిలుపగా, మొత్తం 50 లక్షలా 600 డాలర్లు (సుమారు రూ. 36.24 కోట్లు) లభించాయి.

ఈ విషయాన్ని ఆయన మీడియాకు చెబుతూ, స్క్రాచ్ లాటరీ గేమ్ లో 50 లక్షల డాలర్లు, రెండోసారి 500 డాలర్లు, మూడోసారి 7,276 డాలర్లను తాను గెలుచుకున్నానని చెప్పాడు. ఆగస్టు 2న ఈ ఘటన జరిగిందని లాటరీ నిర్వాహకులతో తన పేరును బయట పెట్టవద్దని కోరానని చెప్పిన ఆయన, ఇప్పటికి బయట పెట్టాడు. ప్రస్తుతం ఆ డబ్బును తన కుటుంబానికి, వ్యాపారాభివృద్ధికి వాడుకుంటున్నానని చెప్పాడు. కాగా, ఈ సంవత్సరం ఆరంభంలో అతనికి మరో లాటరీలో 2,500 డాలర్లు లభించడం గమనార్హం.