Jana Sena: ‘జనసేన’ కవాతు సాంగ్ త్వరలోనే విడుదల చేస్తాం: పవన్ కల్యాణ్

జనసేన పార్టీ అధ్యక్షుడు పవన్ కల్యాణ్ తూర్పు గోదావరి జిల్లా పర్యటన ఈ నెల 15న ప్రారంభం కానుంది. ఈ నేపథ్యంలో పార్టీ నేతలు ఏర్పాట్లు చేస్తున్నారు. ఈ పర్యటన సందర్భంగా జనసేన పార్టీ కవాతు పాటను రూపొందించారు. ‘పద పదపద పద మెరుపలా పద’ అంటూ సాగిన కవాతు సాంగ్ ను పవన్ తన ట్విట్టర్ ఖాతాలో పోస్ట్ చేశారు.

త్వరలోనే ఈ కవాతు సాంగ్ ను విడుదల చేయనున్నామని, ప్రముఖ సంగీత దర్శకుడు తమన్ అద్భుతమైన బాణీలు అందించారని చెప్పారు. ‘కవాతు’ సంకల్పాన్ని ప్రతిబింబించేలా పాటల రచయిత రామజోగయ్య శాస్త్రి సాహిత్యం అందించారని ప్రశంసించారు. ఈ పాటను రికార్డు చేస్తుండగా చిత్రీకరించిన వీడియోను కూడా పవన్ పోస్ట్ చేశారు. ఈ సందర్భంగా తన ఖుషి చిత్రం గురించి పవన్ ప్రస్తావించారు. 2001లో తాను నటించిన ‘ఖుషి’ చిత్రంలోని ‘యే మేరా జహా..’ పాట కంపోజింగ్ లో అప్పుడు టీనేజ్ లో వున్న తమన్ కీలక పాత్ర పోషించారని పవన్ కొనియాడారు.