చిరంజీవితో రెండు సినిమాలు చేశాను.. ఆయనకు డబ్బులు కూడా ఇవ్వలేదు!: తమ్మారెడ్డి భరద్వాజ

తమ్మారెడ్డి భరద్వాజ సమర్పణలో ప్రముఖ సంగీత దర్శకుడు యువన్ శంకర్ రాజా, విజయ్ మోర్వనేనిలు సంయుక్తంగా నిర్మించిన చిత్రం 'ప్యార్ ప్రేమ కాదల్'. తమిళనాట ఘన విజయం సాధించిన ఈ చిత్రాన్ని వీరు తెలుగులో డబ్ చేశారు. ఈ సినిమా ట్రైలర్ ను మెగాస్టార్ చిరంజీవి విడుదల చేశారు. ఈ సందర్భంగా చిరంజీవి మాట్లాడుతూ, యువన్ శంకర్ రాజా నిర్మాతగా మారినందుకు సంతోషంగా ఉందని చెప్పారు. సినీ పరిశ్రమకు యువరక్తం రావాల్సిన అవసరం ఉందని అన్నారు. ఈ చిత్రం ఘన విజయం సాధించాలని ఆకాంక్షించారు.

తమ్మారెడ్డి భరద్వాజ మాట్లాడుతూ, 40 ఏళ్ల క్రితం చిరంజీవితో 'మొగుడు కావాలి' అనే సినిమా తీశానని చెప్పారు. మా నాన్నగారిపై కోపంతో మనం సినిమా చేయాలని చిరంజీవిని అడిగానని... ఆ సినిమా కథ ఏమిటి? దర్శకుడు ఎవరు? అనే వివరాలు కూడా అడక్కుండానే నటించేందుకు ఆయన అంగీకరించారని తెలిపారు. చిరంజీవితో తనకు ఉన్న అనుబంధం వేరని... ఆయనతో రెండు సినిమాలు చేశానని, వాటికి డబ్బులు కూడా ఇవ్వలేదని చెప్పారు. ఆ తర్వాత సినిమాల పరంగా తాము కలుసుకోలేదని.. కొంత కాలం తర్వాత 'అలజడి' సినిమాతో తాను దర్శకుడిగా మారినప్పుడు... పిలవకుండానే వచ్చి చిరంజీవి సక్సెస్ పార్టీ ఇచ్చారని తెలిపారు.