Virat Kohli: చిన్ని అభిమాని కోరికను తీర్చిన విరాట్.. వైరల్ గా మారిన వీడియో!

క్రికెట్ మైదానంలో ప్రత్యర్థులపై విరుచుకుపడే భారత జట్టు కెప్టెన్ విరాట్ కోహ్లీ తన అభిమానుల మనసులను దోచుకోవడంలో ఎప్పుడు ముందుంటాడు. తాజాగా వందలాది మంది మధ్యలో ఓ చిన్ని అభిమాని పిలుపును విన్న కోహ్లీ అతని దగ్గరకు వెళ్లాడు. బుధవారం జరిగిన ఈ ఘటన ఆలస్యంగా వెలుగులోకి వచ్చింది.

ట్రెండ్ బ్రిడ్జ్ లో ఇంగ్లండ్ జట్టుతో జరిగిన టెస్టులో విజయం అనంతరం విరాట్ స్టేడియం బయట అభిమానులకు ఆటోగ్రాఫ్ లు ఇస్తూ ముందుకు సాగాడు. అంతమందిలోనూ ఓ చిరు అభిమాని విరాట్ ను చూసేందుకు దూసుకొచ్చాడు. అక్కడే నిలబడి ‘విరాట్.. ఒక్క ఫొటో ప్లీజ్’ అంటూ అర్థించాడు. దీంతో ఆ పిల్లాడిని చూసిన కోహ్లీ.. అతని దగ్గరకు వెళ్లాడు. స్మార్ట్ ఫోన్ తీసుకుని అతడితో సెల్ఫీ దిగాడు. అంతేకాకుండా ఆటోగ్రాఫ్ కూడా ఇచ్చాడు.

ఏకంగా విరాట్ తో సెల్ఫీ దిగి ఆటోగ్రాఫ్ తీసుకోవడంతో ఆ పిల్లాడి ఆనందానికి అవధులు లేకుండా పోయాయి. ఈ ఘటనకు సంబంధించిన వీడియో ప్రస్తుతం ఇంటర్నెట్ లో వైరల్ గా మారింది. ఐసీసీ టెస్ట్ బ్యాట్స్ మెన్ ర్యాంకింగ్స్ లో విరాట్ ఇటీవల ప్రపంచ నంబర్ వన్ ర్యాంక్ ను సాధించిన సంగతి తెలిసిందే.