మోదీ జీ... మీ ఆధార్ నంబర్ ఇస్తే మొత్తం చెప్పేస్తా: ఫ్రెంచ్ హ్యాకర్ సవాల్

టెలికం రెగ్యులేటరీ అధారిటీ ఆఫ్ ఇండియా (ట్రాయ్) చైర్మన్ ఆర్ఎస్ శర్మ, తన ఆధార్ సంఖ్యను బహిర్గతం చేస్తూ, తనకు చెందిన విషయాలు చెప్పాలని సవాల్ విసిరిన తరువాత ఫ్రెంచ్ సైబర్ నిపుణుడు, స్వయం ప్రకటిత హ్యాకర్ ఇలియట్ ఆండర్సన్, శర్మకు సంబంధించిన పలు వ్యక్తిగత వివరాలు వెల్లడించిన సంగతి తెలిసిందే. శర్మ ప్రత్యామ్నాయ నంబర్, బ్యాంకు ఖాతా, పాన్ కార్డు సంఖ్య తదితరాలను బయట పెట్టిన ఆయన, తన వద్ద ఇంకా చాలా వివరాలు ఉన్నాయని వ్యాఖ్యానించారు.

ఆపై ప్రధాని నరేంద్ర మోదీ ఆధార్ నంబర్ వెల్లడించాలని, అప్పుడు తాను ఆధార్ వ్యవస్థ ఎంత లోపభూయిష్టమో వెల్లడిస్తానని సవాల్ విసిరారు. గత కొన్ని నెలలుగా ఆధార్ అనుసంధానిత వ్యవస్థపై ఆయన విమర్శలు గుప్పిస్తున్న సంగతి తెలిసిందే. కాగా, ఆధార్ సంఖ్య ఆధారంగానే ఆండర్సన్.. శర్మ గురించిన వివరాలు బయట పెట్టారని చెప్పడం అవాస్తవమని ఉడాయ్ వెల్లడించింది. నెట్టింట్లో సెర్చ్ చేసి ఈ వివరాలు తెలుసుకోవచ్చని పేర్కొంది.