software engineer: నా భార్య, అత్తింటివారు నన్ను టార్చర్ పెడుతున్నారు: సాఫ్ట్ వేర్ ఇంజినీర్ ఫిర్యాదు

రూ. 30 లక్షల విలువగల వజ్రాభరణాలు కొనివ్వకుంటే ఆత్మహత్య చేసుకుంటానని తన భార్య తనను బెదిరిస్తోందంటూ ఓ సాఫ్ట్ వేర్ ఇంజినీర్ పోలీసులకు ఫిర్యాదు చేశాడు. వివరాల్లోకి వెళ్తే తెలుగు సాఫ్ట్ వేర్ ఇంజినీర్ అయిన ధీరజ్ రెడ్డి బెంగళూరులోని ఓ ఐటీ కంపెనీలో పని చేస్తున్నాడు. 2014లో జయశ్రుతి అనే యువతిని పెళ్లాడాడు. కొన్నాళ్లు సజావుగా కాపురం సాగాక... తన భార్య నుంచి వేధింపులు మొదలయ్యాయి.

అంతేకాదు, రూ. 2 కోట్లు ఇవ్వాలంటూ అత్తింటివారు డిమాండ్ చేస్తున్నారని ధీరజ్ వాపోయాడు. అడిగిన డబ్బు ఇవ్వకపోతే... అదనపు కట్నం కోసం వేధిస్తున్నట్టు కేసు పెడతామని బెదిరించారని ఫిర్యాదులో ఆయన పేర్కొన్నాడు. తన భార్య సిగరెట్లు, మందు తాగుతుందని... ఈ విషయంపై అత్తామామలకు ఫిర్యాదు చేయగా... వారు ఆమెకే మద్దతు పలుకుతున్నారని... తమ కూతురు చెప్పినట్టు వినాలని బెదిరిస్తున్నారని తెలిపాడు. వీరి టార్చర్ భరించలేకపోతున్నానని చెప్పాడు. కేసు నమోదు చేసిన పోలీసులు, జయశ్రుతితో పాటు ఆరుగురికి నోటీసులు జారీ చేశారు.