srinivas reddy: లేడీ క్యారెక్టర్లో శ్రీనివాస రెడ్డి నటన సూపర్బ్ అంటున్నారు!

'జంబ లకిడి పంబ' అనే పేరు వినగానే ఈవీవీ సత్యనారాయణ గుర్తుకొస్తారు. మగవాళ్లు ఆడవాళ్లుగా .. ఆడవాళ్లు మగవాళ్లుగా ప్రవర్తిస్తూ చేసిన సందడి కళ్లముందు కదలాడుతుంది. ఇప్పుడు అదే టైటిల్ తో శ్రీనివాస రెడ్డి .. సిద్ధి ఇద్నాని జంటగా రూపొందిన సినిమా ఈ రోజున ప్రేక్షకుల ముందుకు వచ్చింది. ఈవీవీ మూవీలో స్త్రీలంతా పురుషులుగా .. పురుషులంతా స్త్రీల మాదిరిగా ప్రవర్తిస్తారు. ఈ సినిమాలో మాత్రం ఆ మార్పు హీరో .. హీరోయిన్ల మధ్య మాత్రమే కనిపిస్తుంది.

 ఈ సినిమా చూసినవాళ్లు .. వరుణ్ పాత్రలో శ్రీనివాస రెడ్డి తెగ సందడి చేసేశాడని చెబుతున్నారు. స్త్రీగా శ్రీనివాస రెడ్డి తన బాడీ లాంగ్వేజ్ ను మార్చుకున్న తీరు సూపర్బ్ అంటున్నారు. అచ్చం అమ్మాయిలా ప్రవర్తిస్తూ హాస్యాన్ని పండించడంలో అదరగొట్టేశాడనే అభిప్రాయాన్ని వ్యక్తం చేస్తున్నారు. కామెడీ ప్రధానంగా సాగే కథలకు శ్రీనివాస రెడ్డి మరింత బలాన్ని ఇస్తాడనే విషయం మరోసారి స్పష్టమైందని చెబుతున్నారు. ఈ సినిమా శ్రీనివాస రెడ్డికి హిట్ తెచ్చిపెడుతుందేమో చూడాలి.