Chennai: చిన్నమ్మాయి పెళ్లి చూపులకని వచ్చి.. పెళ్లయిన పెద్దమ్మాయిని తీసుకుపోయాడు!

చెన్నైలో పోలీసుల ముందుకు ఓ విచిత్రమైన కేసు వచ్చింది. తన చిన్న కుమార్తెను చూసేందుకు పెళ్లి చూపుల నిమిత్తం వచ్చిన ఓ యువకుడు, పెళ్లయి, బిడ్డ తల్లిగా ఉన్న పెద్దమ్మాయిని బుట్టలో వేసుకుని తీసుకుపోయాడన్నది ఓ తండ్రి ఫిర్యాదు. ఆ యువకుడితో కలసి ఇంటి నుంచి వెళ్లిపోయిన పెద్ద కుమార్తె 5 సవర్ల బంగారు నగలు, రూ. 2 లక్షల నగదు తీసుకెళ్లిందని కూడా ఆయన ఫిర్యాదు చేశాడు.

మరిన్ని వివరాల్లోకి వెళితే, చెన్నై, మైలాపూరు పరిధిలోని ఏకాంబరం పిళ్లైకి చెందిన ఓ వ్యక్తికి ఇద్దరు కుమార్తెలు. పెద్దమ్మాయికి (26) పెళ్లి అయి, మూడేళ్ల కొడుకున్నాడు. చిన్నమ్మాయి (22)కి వివాహం చేయాలన్న ఉద్దేశంతో సంబంధాలు వెతుకుతుండగా, అన్నాదురై (28) అనే యువకుడి సంబంధం గత జనవరిలో వచ్చింది. పెళ్లి చూపులకు వచ్చిన అతను, ఆ సమయంలో పెద్దమ్మాయితో మాట కలిపాడు. పెళ్లి విషయమై ఎలాంటి నిర్ణయాన్ని చెప్పలేదుగానీ, పెద్దమ్మాయితో మాట్లాడుతూ ఆమెకు దగ్గరయ్యాడు.

ఈ నేపథ్యంలో బుధవారం సాయంత్రం పెద్ద కుమార్తె అదృశ్యం కాగా, ఆమె అన్నాదురైతో కలసి వెళ్లిపోయిందని తెలుసుకున్న తండ్రి లబోదిబోమంటూ పోలీసులను ఆశ్రయించాడు. ఆ జంట ఎక్కడుందో కనిపెట్టేందుకు ప్రయత్నిస్తున్నామని పోలీసులు తెలిపారు.