america: భారత్ వద్ద అత్యంత ప్రమాదకరమైన ఆయుధాలు.. అణు యుద్ధం తప్పకపోవచ్చు: పాకిస్థాన్

దక్షిణాసియా ప్రాంతం ప్రమాదపుటంచుల్లోకి వెళ్తోందని... స్థిరత్వం దెబ్బతింటోందని పాకిస్థాన్ భద్రతా సలహాదారు, రిటైర్డ్ లెఫ్టినెంట్ జనరల్ నజీర్ ఖాన్ జాంజువా ఆందోళన వ్యక్తం చేశారు. అణుయుద్ధం జరిగే అవకాశం ఉందని అన్నారు. చైనా-పాకిస్థాన్ ఎకనామిక్ కారిడార్ విషయంలో భారత్ తో కలసి అమెరికా కుట్రలకు పాల్పడుతోందని ఆరోపించారు.

ఈ క్రమంలో అత్యంత ప్రమాదకరమైన ఆయుధాలను భారత్ సమకూర్చుకుంటోందని, వాటన్నింటినీ స్టాక్ పెట్టుకుంటోందని తెలిపారు. ఈ ఆయుధాలతో ప్రతిసారి పాక్ ను భయపెడుతూ వస్తోందని అన్నారు. ఈ నేపథ్యంలో, అణు యుద్ధం జరిగే అవకాశాలను కొట్టిపారేయలేమని చెప్పారు.

ఆఫ్ఘనిస్థాన్ లో తాలిబన్ల ప్రాబల్యం పెరుగుతుండటంతో...అమెరికా తన వైఫల్యాలను పాకిస్థాన్ పైకి నెడుతోందని నజీర్ మండిపడ్డారు. ఆఫ్ఘన్ అంతర్గత వ్యవహారాల్లో జోక్యం చేసుకునే అవకాశాన్ని భారత్ కు అమెరికా ఇస్తోందని చెప్పారు.