Donald Trump: బొక్కబోర్లాపడ్డ జపాన్ ప్రధాని.. పట్టించుకోకుండా ముందుకెళ్లిపోయిన ట్రంప్!

సోషల్ మీడియాలో అమెరికా అధ్యక్షుడు డొనాల్డ్ ట్రంప్ పై తీవ్ర ఆగ్రహం వ్యక్తమవుతోంది. దాని వివరాల్లోకి వెళ్తే... తన ఆసియా పర్యటనలో భాగంగా ట్రంప్ జపాన్‌ లో పర్యటించిన సంగతి తెలిసిందే. ఈ సందర్భంగా జపాన్ ప్రధాని షింజో అబేతో ట్రంప్ సరదాగా గోల్ఫ్ ఆడారు. అనంతరం ట్రంప్ బయల్దేరడంతో, ఆయనకు మర్యాదపూర్వక వీడ్కోలు పలికేందుకు షింజో వేగంగా కదిలారు.

ఈ క్రమంలో ఆయన కాలు జారి పక్కనే వున్న గుంతలో పడిపోయారు. అబే పడిపోయిన విషయాన్ని ఏమాత్రం గమనించని ట్రంప్ తన దారిన తాను కారెక్కి వెళ్లిపోయారు. ఈ వీడియో జపాన్ సోషల్ మీడియాలో వైరల్ అయింది. దీంతో ప్రధాని పడిపోయినా పట్టించుకోలేదంటూ ట్రంప్ పై నెటిజన్లు మండిపడుతున్నారు. గుంతలో ఇసుక ఎక్కువగా ఉండడం వల్ల అందులో కాలుదూరి తడబడి ప్రధాని కిందపడిపోయారని భద్రతాధికారులు తెలిపారు.