India: ప్రపంచ అథ్లెటిక్స్ లో అరుదైన రికార్డు సృష్టించిన భారత లాంగ్ జంపర్ శ్రీ శంకర్
- పురుషుల లాంగ్ జంప్ లో ఫైనల్ చేరిన భారత పురుష అథ్లెట్ గా ఘనత
- స్టీపుల్ ఛేజ్ లో ఫైనల్ కు అర్హత సాధించిన అవినాశ్
- ఈ టోర్నీ చరిత్రలో భారత్ కు ఇప్పటిదాకా ఒకే ఒక్క పతకం
ప్రపంచ అథ్లెటిక్స్ ఛాంపియన్‌షిప్స్ లో భారత లాంగ్ జంపర్ మురళీ శ్రీశంకర్ చరిత్ర సృష్టించాడు. అమెరికాలో జరుగుతున్న ఈ టోర్నీలో ఫైనల్ చేరిన భారత తొలి పురుష లాంగ్ జంపర్ గా రికార్డు సృష్టించాడు. శ్రీశంకర్ తోపాటు అవినాశ్ సాబ్లే పురుషుల 3000 మీటర్ల స్టీపుల్‌చేజ్‌ పతక రౌండ్ కు అర్హత సాధించాడు.
ఈ సీజన్‌లో నిలకడగా రాణిస్తున్న శ్రీశంకర్ శనివారం తెల్లవారుజామున జరిగిన పురుషుల లాంగ్ జంప్ అర్హత పోటీల్లో ఎనిమిది మీటర్ల దూరం దూకాడు. తన సమీప పోటీదారులైన జెస్విన్ ఆల్డ్రిన్ (7.79 మీటర్లు), ముహమ్మద్ అనీస్ యాహియా (7.73 మీ) కంటే ముందుగా 8 మీటర్లు దూకి నేరుగా ఈవెంట్‌లో ఫైనల్‌కు అర్హత సాధించాడు.
శ్రీశంకర్ మే నెలలో అత్యధికంగా 8.36 మీటర్ల మార్కు అందుకున్న నేపథ్యంలో ఈ ప్రతిష్ఠాత్మక పోటీల్లో పతకం సాధించే అవకాశం కనిపిస్తోంది. ప్రపంచ అథ్లెటిక్స్ లో భారత్ నుంచి ఇప్పటిదాకా అంజూ బాబీ జార్జ్ (లాంగ్ జంపర్) ఏకైక కాంస్య పతకం గెలిచింది. ఇక, భారత ఆర్మీ క్రీడాకారుడైన అవినాశ్ 3000 మీటర్ల స్టీపుల్‌చేజ్‌లో 8:18.75 టైమింగ్‌తో హీట్స్ లో మూడో స్థానంలో నిలిచి నేరుగా పతక రౌండ్ కు అర్హత సాధించాడు.
