Telugudesam: దుర్గమ్మ గుడిలో లోకేశ్ కోసం తాంత్రిక పూజలు.. అందుకే నివేదికను తొక్కిపెట్టారు!: బీజేపీ నేత ఆరోపణ

ఆంధ్రప్రదేశ్ ఐటీ మంత్రి నారా లోకేశ్ పై బీజేపీ అధికార ప్రతినిధి ఉమామహేశ్వర రావు తీవ్రంగా మండిపడ్డారు. విజయవాడ కనక దుర్గ గుడిలో లోకేశ్ కోసం టీడీపీ నేతలు అర్ధరాత్రి తాంత్రిక పూజలు నిర్వహించారని ఆరోపించారు. అందువల్లే ఈ ఘటనకు సంబంధించి నివేదికను టీడీపీ నేతలు తొక్కిపెట్టారని విమర్శించారు. ఈ రోజు విజయవాడలో జరిగిన ఓ సమావేశంలో ఉమామహేశ్వర రావు మాట్లాడారు.

చంద్రబాబుకు బీసీలు అంటే నచ్చరనీ, అందువల్లే దుర్గ గుడి పాలకమండలి సభ్యురాలు సూర్యలతను తొలగించారని ఆగ్రహం వ్యక్తం చేశారు. ఈ తాంత్రిక పూజలు చేయించిన ఆలయ ఈవో సూర్యకుమారికి రాష్ట్ర ప్రభుత్వం మంచి పోస్టింగ్ ఇచ్చి సత్కరించిందని ఎద్దేవా చేశారు.

బీజేపీ రాజ్యసభ సభ్యుడు జీవీఎల్ నరసింహారావు రూ.100 కోట్ల అవినీతికి పాల్పడ్డారని చెబుతున్న నేతలు.. దమ్ముంటే ఈ ఆరోపణలపై సీబీఐ విచారణకు ఆదేశించాలని డిమాండ్ చేశారు. ప్రభుత్వ అవినీతిని ప్రశ్నిస్తే దాడులు చేయిస్తారా? అని ఆగ్రహం వ్యక్తం చేశారు.